.png)
Ceremonia zyrtare e edicionit të 24 –t i Festivalit të Filmit në Sarajevë, i cili e ngriti siparin mbrëmjen e 10 gushtit është prezantuar nga aktori me origjinë shqiptare, Alban Ukaj, i cilësuar nga ky festival si një prej aktorëve më të rëndësishëm të brezit të ri. Besimi që ky festival u jep brezave të rinj, që do të udhëheqin kinemanë e së ardhmes, vjen si shenjë e mbështetjes dhe promovimit të kineastëve të rinj të rajonit.
Ukaj, i lindur më 1980-ën, në Prishtinë, ka ndjekur studimet në Akademinë e Arteve Dramatike në Prishtinë, në klasën e profesor Faruk Begollit, ndërsa më 2001-shin, u shpërngul drejt Sarajevës për të vijuar studimet në Akademinë e Arteve Performuese në Sarajevë, ku prej asaj kohe angazhohet në teatrot e Sarajevës, si edhe në prodhimet filmike si “Notre Musique” nga Jean-Luc Godard, “Syri Magjik”, me regji të Kujtim Çashkut, “Rojtarët e Natës” nga Namik Kabil, “Heshtja e Lornës” nga Jean-Pierre Dardenne dhe Luc Dardenne, film i vlerësuar në Festivalin e Kanës,“Bota” nga Iris Elezi, i vlerësuar me çmim në Festivalin e Filmit Karlovy Vary dhe “Martesa” nga Blerta Zeqiri, vlerësuar në Festivalin e Filmit të Talinit, si edhe pjesëmarrës në këtë edicion të Festivalit të Sarajevës.
Ukaj është vlerësuar disa herë si aktori më i mirë në festivalet e teatrit në Bosnjë dhe Hercegovinë, si edhe në rajonin e Ballkanit dhe është anëtar i përhershëm i Ansamblit të Teatrit të Luftës në Sarajevë (SARTR). Ai ka realizuar filmin e tij të parë me metrazh të shkurtër “Kali” , ku veç regjisë ka shkruar edhe skenarin, film i cili është vlerësuar në disa festivale ndërkombëtarë në Europë dhe Amerikë. Ai është bashkëthemelues i “Kontakt”, shoqatës për promovim dhe eksplorim të arteve performuese në Bosnjë dhe Hercegovinë. Aktualisht Ukaj po punon për realizimin e filmit të tij të dytë me metrazh të shkurtër.
Gjatë ceremonisë së cceljes së këtij festivali, regjisori Nuri Bilge Ceylan dhe themeluesi i Fondacionit Hastor, Nijaz Hastor u vlerësuan me Zemrën e Nderit të çmimeve të Sarajevës.
Ceremonia më pas vijpi me shfaqjen e filmit “Lufta e Ftohtë”, të regjisorit Pawel Pawlikowski, fitues i çmimit ‘Oscar’ dhe po me këtë film, është vlerësuar si regjisori më i mirë në edicionin e 71-të të Festivalit të Filmit në Kanë. Pawlikowski nuk është i vetmi fitues i ‘Oscar’-it që merr pjesë në këtë ngjarje të filmit. I pranishëm është edhe kineasti iranian Asghar Farhadit, dy herë fitues i çmimeve të Akademisë, i cili është në krye të jurisë ndërkombëtare.
Këtë vit, do të shfaqet një shifër rekord prej 266 filmash nga 56 shtete , nga të cilët 52 prej tyre do të kenë premierat botërore, ka bërë të ditur drejtori i festivalit, Mirsad Purivatra.
Festivali , i fokusuar në promovimin e autorëve nga Europa Lindore e Juglindore ka forcuar bashkëpunimin mes vendeve të Ballkanit, duke krijuar një platformë pajtimi përmes artit. Festivali i Filmit në Sarajevë vlerësohet si konkursi dhe platforma më e madhe e industrisë së filmit, me një shtrirje nga Vjena në Stamboll.
I prezantuar në vitin 1995 si një akt sfide ndaj shtetrrethimit prej 43 muajsh të Sarajevës nga forcat boshnjake-serbe, festivali është shndërruar në një fener të mbijetesës kulturore të kryeqytetit boshnjak, duke tërhequr me mijëra pjesëmarrës çdo vit dhe me një ndikim domethënës në ekonominë vendase. Një studim i pavarur nga Olsberg SPI, organizata britanike për konsulencë, ka zbuluar se Festivali i Sarajevës ka gjeneruar 30.8 milionë dollarë për ekonominë e Sarajevës, vitin e shkuar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
