Qeveria shqiptare ndryshon sërish buxhetin e 2020-ës përmes një akti normativ.
Ndryshimet janë udhëhequr në krahun e shpenzimeve dhe kufirin e borxhit publik. Të ardhurat kanë mbetur të paprekura.
Ky është ndryshimi i dytë brenda një kohe të shkurtër, pas atij të mesit të marsit, ndryshim të cilin Ministrja për Financat dhe Ekonominë Anila Denaj e kishte paralajmëruar pak ditë më parë si pasojë e situatës që ka shkaktuar Covid-19.
Referuar aktit normativ, kufiri i borxhit publik rritet me 1 % ose 14, 9 miliardë lekë (116 mln euro).
Kurse në raport me PBB-në e vitit 2019, sipas ndryshimeve të fundit, borxhi publik është rritur me 0,8%.
Sipas aktit normativ, rritja e borxhit publik do të përdoret për të fuqizuar fondin rezervë të Këshillit të Ministrave i cili shkon në rreth 16,2 miliardë lekë ose 116 milionë euro nga 1.7 miliardë lekë që ishte planifikuar në ligjin e buxhetit 2020, ku pjesa më e madhe tij do të përdoret për financimin e paketës sociale anti-Covid.
Ndryshimi i fundit i buxhetit ka shkurtuar shpenzimet e qeverisë qendrore me rreth 5,5 miliardë lekë, duke i çuar në 407,2 miliardë lekë.
Të ardhurat totale nuk kanë ndryshuar. Megjithatë për tremujorin ato rezultuan me një tkurrje prej 4%, kurse në mars, ranë me 19%.
Të ardhura për 2020, në buxhetin e rishikuar në mes të marsit priten në 490 miliardë lekë
Mënyra se si do të përdoret fondi i ri rezervë me vlerë 16, 2 mld lekë
Sipas aktit normativ, fondi rezervë i buxhetit përdoret nga Këshilli i Ministrave, si më poshtë vijon:
– 1 700 milionë lekë për raste të paparashikuara të njësive të qeverisjes së përgjithshme;
– 13 500 milionë lekë si kontingjencë për paketën sociale anti-Covid-19.
– 1 000 milionë lekë për emergjenca të tjera në kuadër të masave anti-Covid 19.
Kontingjenca për rrisqet e borxhit prej 4 000 milionë lekësh përdoret nga ministri përgjegjës për Financat për të kompensuar rreziqe potenciale nga luhatjet në kurset e këmbimit ose normat e interesit, me ndikim në shpenzimet për interesa.
Përjashtimisht për vitin 2020, kritereve të shpërndarjes së fondit rezervë i shtohen edhe shpenzimet për shkak të situatës së krijuar nga Covid-19.
Qeveria ka marrë më herët në formë borxhi për emergjencën 174 milionë euro nga FMN përmes aktivizimit të Instrumentit të Shpejtë të Financimit (RFI), ndërsa ka siguruar në tregun e brendshëm 100 milionë euro, përmes emetimit të obligacioneve me interes fiks dyvjeçar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.