Deklarata e Presidentit Ilir Meta mëngjesin e kësaj të marte perceptohet “normale” në kushtet e një krizë e përplasjeje anormale mes tij dhe mazhorancës. Por, nëse zhvishet nga gjuha e kujdesshme, Ilir Meta përçoi disa mesazhe të forta ndaj mazhorancës, ndaj Komisionit Qendror të Zgjedhjeve, e deri kundër ndërkombëtarëve dhe fondacionet ndërkombëtare.
Mesazhi më i fortë u dha në fund të daljes para gazetarëve. Në mars, gjatë një aktiviteti në Pogradec, Meta u shpreh i gatshëm që të dorëhiqej, madje edhe të “vetësakrifikohej” si Salvador Allende që në vend të mos instalohej një juntë që do ta kthente vendin 30 vite pas. Por, sot kur u pyet nëse e mendonte ende dorëheqjen, Presidenti tha që jo vetëm nuk do të dorëhiqej, por do ta drejtonte institucionin e Presidencës deri në fund të mandatit edhe në betejën për të shmangur, sipas tij, vendosjen e një tiranie personale.
“Nga ky institucion do të fillojë ringritja e Republikës, Shqipëria nuk do të kthehet në një tirani personale të askujt dhe në asnjë koloni të asnjë fondacioni ndërkombëtar. Ky është një vend që u takon të gjithë shqiptarëve dhe bashkë do të jemi këtu deri më 24 korrik të vitit 2022”, u përgjigj ai.
Ajo që ka ndryshuar nga marsi deri më tani, sipas deklaratës së Presidentit është që vendi rrezikon të kthehet në një tirani personale, apo koloni fondacioni ndërkombëtar, nëse mazhoranca ecën përpara për të zhvilluar zgjedhjet më 30 qershor, edhe pse në gjysmën e bashkive nuk ka rivalë. Se cilat janë mekanizmat që do t’i mundësojnë Presidentit parandalimin e instalimit të juntës, Meta nuk i shtjelloi.
“Presidenti i Republikës do të bëjë çdo veprim me shumë qetësi, me shumë përgjegjshmëri, dhe do t’i shërbejë gjithmonë mbrojtjes së Republikës dhe interesave të saj, shpresojmë ta bëjnë këtë të gjithë institucionet dhe të gjithë qytetarët së bashku”, thotë Meta.
Deklarata, në thelb ishte edhe një kundërvënie e hapur ndaj ndërkombëtarëve. Nga Italia dhe Shtetet e Bashkuara të Amerikës ditën e hënë mbërritën dy sinjale mbështetëse për mazhorancën dhe zhvillimin e zgjedhjeve më 30 qershor.
“Unë nuk kam anuluar zgjedhjet as në Itali, as në Amerikë dhe as në Kinë. Nuk kam anuluar zgjedhjet në asnjë vend, në asnjë ambasadë, në asnjë fondacion ndërkombëtar. Kam anuluar zgjedhjet në Republikën e Shqipërisë para të gjithë shqiptarëve. Kam anuluar zgjedhjet në Shqipëri për shkak të një krize shumë të rëndë politike, që besoj se e keni vënë re prej muajsh, me qëllim normalizimin e situatës në vend dhe njëkohësisht për të gjetur rrugën dhe datën për zgjedhje gjithëpërfshirëse”, deklaroi Meta.
Asnjë zë ndërkombëtar nuk e ka lidhur deri më tani hapjen e negociatave me zgjedhjet e 30 qershorit, por thuajse në çdo deklaratë përmendet reforma në drejtësi. Meta akuzoi ambasadorët dhe ndërkombëtarët si të pasinqertë me qytetarët shqiptarë, pasi sipas tij, edhe nëse zgjedhjet e 30 qershorit përshëndeten nga opozita që i ka bojkotuar, procesi do të minonte për një kohë të gjatë rrugën integruese të vendit tonë.
“Mos prisni nga asnjë ambasador t’ju thotë këtë që po ju them unë, sepse edhe po të bëheshin zgjedhjet më 30 qershor, që nuk ekzistojnë më ligjërisht, pa opozitën, edhe sikur i gjithë populli opozitar që nuk do të merrte pjesë, do të dilte të duartrokiste ata që do të shkonin të votonin, pa pjesëmarrjen e opozitës, e ardhmja europiane e Shqipërisë dhe çelja e negociatave do të kishte një fat të paditur për një kohë shumë të gjatë”, u shpreh ai.
Një prej mbështetësve kryesorë të reformës në drejtësi ka qenë Fondacioni Soros. Meta nuk e përmendi në emër, por dukshëm i referohet këtij fondacioni kur thotë se nuk do të lejojë që vendi të shndërrohet në një koloni të një fondacioni ndërkombëtar.
Komisionin Qendror të Zgjedhjeve, që nuk i njeh dekretin, Meta e cilësoi si një zgjatim të Partisë Socialiste, tha se ky institucion dhe të gjitha institucionet e tjera që vazhdojnë përgatitjet për zgjedhjet e 30 qershorit janë në paligjshmëri dhe kërkoi reflektim prej tyre. Në krye të të gjithë kësaj, që Meta e quan paligjshmëri qëndron, sipas tij, Edi Rama.
“Nën direktivat e tij, Kuvendi miratoi një Rezolutë parlamentare, nëpërmjet së cilës iu bënte thirrje të gjitha institucioneve shtetërore, që të mos zbatonin Dekretin e Presidentit të Republikës, edhe pse ky Dekret ishte botuar në Fletore Zyrtare duke qenë i detyrueshëm për zbatim nga të gjithë, përfshirë këtu edhe Kuvendin e Shqipërisë”, thotë Presidenti.
E po nën direktivat e Ramës, sipas Metës u mor edhe vendimi i Kolegjit Zgjedhor për t’i refuzuar Partisë së Unitetit Kombëtar çregjistrimin nga zgjedhjet e 30 qershorit. Meta thotë se vendimi i marrë është nul dhe që lidhet vetëm me marrëdhënien mes partisë ankuese, që thekson se është aleate e Partisë Socialiste dhe Komisionit Qendror të Zgjedhjeve, por që nuk prek dekretin e tij.
“Në këtë proces Kolegji Zgjedhor nuk mund të shqyrtonte aspak vlefshmërinë kushtetuese të Dekretit të Presidentit të Republikës, pasi një tagër të tillë nuk ia njeh Kushtetuta. Institucioni i Presidentit të Republikës nuk është thirrur nga kjo gjykatë zgjedhore si palë në proces, e për rrjedhojë vendimi i marrë nuk mund të prodhojë asnjë efekt juridik, qoftë për Dekretin, ashtu edhe për anulimin e datës së zgjedhjeve. Vendimi ka efekt vetëm përkundrejt palëve në proces, dhe vetëm për atë çka është vendosur midis këtyre dy palëve: pra midis organizatës socialiste në Komisionin Qendror të Zgjedhjeve dhe aleatit të Partisë Socialiste”, deklaron Meta.
Prapa këtij vendimi të Kolegjit, Meta thotë se qëndron mazhoranca dhe duke përdorur termat e Partisë Demokratike e cilëson atë truk procedurial për të justifikuar paligjshmërinë e KQZ-së të marrë nën shantazh dhe presion.
“Është e qartë se ky vendim i Kolegjit Zgjedhor, i orkestruar dhe i paralajmëruar prej kohësh, është marrë në kushtet e presionit dhe shantazhit politik të mazhorancës, mjafton që të shihen fotot e publikuara në media të atyre (gjyqtarëve). Dukeshin shumë të frikësuar”, u shpreh Presidenti.
Ilir Meta nuk foli për një plan B, ndërsa vendosi si kusht për nisjen e bisedimeve mes opozitës dhe mazhorancës tërheqjen e kësaj të fundit nga bindja për të realizuar zgjedhjet më 30 qershor.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.