.png)
Bohemian Rhapsody ishte fituesi i madh i edicionit të 76-të të Çmimeve Golden Globes, mbrëmjen e së dielës, duke rrëmbyer trofeun e filmit më të mirë dramatik. Rami Malek fitoi gjithashtu çmimin si aktori më i mirë për portretizimin e Freddie Mercury-it. “Faleminderit Freddie Mercury, që më dhe gëzimin e një jete”, tha Malek në fjalimin e tij, gjatë marrjes së çmimit. “Të dua, o njeri i bukur! Kjo për ty dhe prej teje!". Glenn Close u shpall aktorja më e mirë dramatike, duke lënë pas Lady Gaga-n për rolin e saj në “A Star is Born”.
Gaga dhe ekipi i saj, megjithatë, arritën të fitonin çmimin për këngën më të mirë origjinale, titulluar “Shallow”. Ky është edhe i dyti glob i artë për këngëtaren, në karrierën e saj. Këngëtarja u përlot ndërsa bashkë me ekipin morën çmimin për këngën më të mirë origjinale në filmin “A Star is Born”. Mbrëmja nisi me yjet që parakaluan në tapetin e kuq, duke ndarë mesazhe solidariteti për Lëvizjen “Time’s Up”.Disa mbanin byzylykë të zinj gome, ndërsa të tjerë stema që u referoheshin fushatave për të dyfishuar numrin e grave në poste drejtuese.
Fituesit e mëdhenj
Në kategorinë e filmave dramatikë, Glenn Close mposhti Lay Gaga, Nicole Kidman, Melissa Mçarthy dhe Rosamund Pike për rolin e saj të fuqishëm në “The Wife”, adaptimi kinematografik i romanit të Meg Wolitzer, me të njëjtin titull. Fjalimi i Close, një ode galvanizuese dhe e ndjerë për gratë që ndjekin ëndrrat e tyre, mori edhe ovacionet më të mëdha, ndërsa aktorja e kandiduar 13 herë për Golden Globe, hoqi paralele ndaj vështirësive të personazhit të saj, për njohje dhe përmbushje përballë bashkëshortit Nobelist në Letërsi. “Është titulluar “Bashkëshortja” ndaj iu deshën edhe 14 vjet për t’u realizuar”, tha Close, e cila është në një pozicion të mirë për të fituar të parin “Oscar”, muajin që vjen në Çmimet e Akademisë.
“Jemi gra dhe ushqejmë, kemi fëmijët tanë dhe bashkëshortët nëse jemi aq me fat, ose partnerët tek e fundit. Por duhet të gjejmë përmbushjen vetjake. Duhet të ndjekim ëndrrat tona.” Ky rol, shtoi aktorja, i kujtonte asaj, vendin e së ëmës në shoqëri dhe sesi gratë sot mund të kërkojnë për më shumë. “Po mendoj për mamanë time, e cila ia nënshtroi veten tim eti”, tha Close gjatë fjalës së saj, duke theksuar se kur e ëma ishte në të tetëdhjetat, ajo vuri në pikëpyetje se çfarë kishte arritur në jetën e saj, përveç rolit të bashkëshortes dhe nënës. “Duhet të gjejmë përmbushjen personale, duhet të ndjekim ëndrrat tona duhet të them “mund ta bëj këtë” dhe duhet të më lejohet ta bëj këtë”, tha Close.
Ndërkohë Rami Malek mërziti Bradley Cooper, pasi fitoi çmimin si aktori më i mirë, duke bërë që aktori dhe regjisori i filmit “A Star is Born” , i kandiduar për pesë çmime në mbrëmje dhe fitoi vetëm atë të këngës më të mirë, u kthye në shtëpi i zhgënjyer. Filmi “Bohemian Rhapsody” ndjek karrierën e grupit Queen, duke kulmuar me performancën e tyre legjendare më 1985-ën, në koncertin “Live Aid”. Regjisori i filmit Graham King, ia dedikoi fitoren Mercury-it, liderit të ndjerë të grupit. “Faleminderit që na tregove fuqinë për të përqafuar veten tënde të vërtet”, u shpreh King. “Kjo është për ty.”
Christian Bale falënderon Satanin që e frymëzoi për portretizimin e Dick Cheney
Christian Bale, padyshim ishte kryetitulli me metamorfozën fizike, t së cilës iu nnështruar për rolin e tij i Dick Cheney në “Vice”. Aktori e përdori fjalën e tij në Golden Globes për të ngacmuar Drejtuesin e Shumicës në Senat Mitch McConnell dhe ish-zëvendëspresidentin Dick Cheney. Bale fitoi çmimin si aktori më i mirë në kategorinë mjuzikal/ komedi për porterizimin e Cheney-it në filmin satirik “Vice”. “Duhet të gjej dikë që është pa asnjë karizmë dhe i urryer nga të gjithë”, tha Bale duke cituar fjalët e regjisorit të filmit, Adam McKay. “Dhe kështu mendoi: Ah, duhet të jetë Bale në këtë.” Faleminderit për të gjithë konkurrencën, do ta kem mbërthyer tregun e trapave aspak karizmatikë. Ç’mendim keni sikur i radhës të jetë Mitch McConnell?, tha Bale. “Do të ishte mirë”, ndërsa shtoi në fund “Faleminderit Satan që më frymëzove si ta luaj këtë rol.” Olivia Colman fitoi çmimin si aktorja më e mirë në një komedi për komedinë “The Favourite”, ndërsa të kandiduar për ishin edhe aktoret Emma Stone dhe Rachel Weisz , që interpretojnë në të njëjtin film. Stone dhe Weisz, u mposhtën nga Regina King, që fitoi si aktorja më e mirë jo protagoniste për “If Beale Street Could Talk”. Ajo sfidoi muzikën orkestrale gjatë ceremonisë për të bërë një apel për barazinë në Hollivud.
Regina King: Gjithçka që do të prodhoj, do të jetë me 50 përqind gra
Gjatë fjalës së saj falënderuese për çmimin si aktorja më e mirë jo protagoniste në filmin “If Beale Street Could Talk”, Regina King bëri me zë mbështetjen e saj për lëvizjen “Times Up” , me një premtim për të përfshirë më shumë gra. “Po bëj një zotim dhe do të jetë i fortë, që gjithçka do të bëj, do të jetë me pesëdhjetë përqind gra.” Ajo u dha zemër shikuesve, t’i bashkoheshin asaj, duke thënë “Sfidojë këdo aty jashtë që është në pozicionin – dhe jo në industrinë tonë, por në të gjitha industritë – të sfidoj të sfidosh veten. Arsyeja pse e bëjmë këtë është për shkak se kuptojmë se mikrofonat tanë janë të mëdhenj dhe se ne flasim për të gjithë”, tha King. Gjatë fjalës falënderuese për punën e saj në “The Marvelous Ms. Maisel”, Rachel Brosnahan mori një çast për të theksuar drejtimin e dominuar nga gratë në këtë serial televiziv.
“Fshati ynë është matriarkati”, tha Brosnahan. “Kemi gra në shumë role drejtuese.”
Ajo fitoi një Golden Globe si aktorja më e mirë në një serial televiziv në katogeorinë muzikal/komedi. Ajo fitoi të njëjtin çmim, për të njëjtin rol, edhe vitin e kaluar.
Jeff Bridges fiton çmimin e karrierës
Jeff Bridges, i njohur për rolet e tij në “Big Lebowski” dhe “Crazy Heart”, fitoi çmimin e arritjeve në karrierë. Çmimi Cecil B. deMille nderon “një individ me talent që ka pasur ndikim jetëgjatë në botën e argëtimit”. Në fjalën e tij, Bridges theksoi rëndësinë e secilit individ dhe sesi çdo njeri mund të bëjë ndryshimin në përmirësimin e komunitetit të tij. “Jemi gjallë, mund të bëjmë ndryshimin dhe mund ta kthejmë anijen në kursin që duam të ndjekim”, tha Bridges. Ai e nisi karrierën kinematografike herët. Si fëmijë, ka luajtur në rolin e paatribuuar, më 1951-shin “The Company She Keeps” dhe është shfaqur në serialin televiziv të të atit “Sea Hunt”. Të tjerë fitues të këtij çmimi karrierë përfshijnë aktorë si Audrey Hepburn, Robert De Niro, Harrison Ford, George Clooney, Jodie Foster, Robin Williams dhe Oprah Winfrey. Michael Douglas, i cili interpreton Sandy Kominsky në serialin krijuar të Netflix, fitoi çmimin si aktori më i mirë në një serial komik, duke i shtuar mantelit të tij të dekoruar mirë një Glob të katërt, që përfshin edhe atë të karrierës Cecile B DeMille, më 2004-ën.
Carol Burnett pas 7 dekadash fiton të parin çmim në jetë
Të dielën në mbrëmje, Carol Burnett u bë e para fituese e një çmimi për arritjet në karrierën televizive në Golden Globes, që mban vetë emrin e saj; Çmimi Burnett. Në fjalën e saj ajo tha sesi ishte dashuruar me filmat dhe televizionin kur ishte fëmijë dhe ëndrrat rinore për të punuar në këtë industri. “Dëshiroja dhe shpresoja se ndoshta, ndoshta, një ditë, do të kisha mundësinë të bëja të njëjtën gjë.” Burnett, karriera e së cilës në televizion kap shtatë dekada, është e njohur për varietenë e saj “The Carol Burnett Show”, e transmetuar nga 1967 deri më 1978 –ën dhe ka qenë i pari emision i llojit të tij që prezantohej nga një grua.
Golden Globes 2019
Filmi më i mirë dramatik: Bohemian Rhapsody
Filmi më i mirë komedi: Green Book
Regjisori më i mirë: Alfonso Cuarón, “Roma”
Aktori më i mirë në një film dramatik: Rami Malek (Bohemian Rhapsody)
Aktorja më e mirë në një film dramatik: Glenn Close (The Wife)
Aktori më i mirë në komedi/muzikal: Christian Bale (Vice)
Aktori më i mirë jo protagonist: Mahershala Ali, “Green Book”
Aktorja më e mirë jo protagonsite: Regina King, “If Beale Street Could Talk”
Skenari më i mirë: Nick Vallelonga, Brian Currie dhe Peter Farrelly, “Green Book”
Filmi më i mirë i animuar: “Spider-Man: Into the Spider-Verse”
Filmi më i mirë në gjuhë të huaj: “Roma”
Skenari më i mirë origjinal : Justin Hurwitz, “First Man”
Kënga më e mirë origjinale: “Shallow” — “A Star Is Born”
Aktorja më e mirë në komedi/muzikal: Olivia Colman (The Favourite)
Drama më e mirë televizive: The Americans
Komedia më e mirë Televizive: The Kominsky Method
Aktori më i mirë në një dramë televizive: Richard Madden (Bodyguard)
Aktorja më e mirë në dramë televizive: Sandra Oh (Killing Eve)
Aktori më i mirë në komedi televizive: Michael Douglas (The Kominsky Method)
Aktorja më i mirë në komedi televizive: Rachel Brosnahan (The Marvellous Mrs Maisel)
Seriali më i mirë i limituar: The Assassination of Gianni Versace: American Crime Story
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
