Rend dhe Ligj

Biletat false, Policia e Shtetit merr nën përgjegjësi portat e sigurisë në ‘Air Albania’

Gazeta Si - Pas incidenteve të fundit që janë shënuar në stadiume, Policia e Shtetit do të marrë nën përgjegjësi të gjitha portat e sigurisë në ‘Air Albania’, pasi janë evidentuar raste që nëpër ndeshje janë futur persona që nuk kishin prerë fare bileta.

Ministri i Brendshëm, Taulant Balla tha se gjatë ndeshjes së kombëtares shqiptare me Poloninë për EURO 2024, janë konstatuar 12 mijë tentativa për bileta false.

Balla bëri të qartë se të gjithë ata persona që kapen me biletë false përbëjnë vepër penale dhe do shoqërohen në polici e më pas do nisë hetimi.

“Pas analizës së eventit sportiv mes kombëtares dhe Polonisë, disa prej konkluzioneve mendoj se janë me vend dhe duhet të ndiqen nga FSHF dhe Policia e Shtetit, - tha Balla. - Për të gjithë ata që kanë lejuar të hapet porta e sigurisë dhe të hynë persona të papajisur me bileta në ‘Air Albania', duhen nxjerrë edhe përgjegjësitë e punonjësve të policisë, të cilët duhet të kishin ndërhyrë. Porta e sigurisë do jenë përgjegjësi e Policisë së Shtetit".

Sipas Ballës, "gjatë ndeshjes me Poloninë kemi pasur 12 mijë tentativa për bileta false. Disponimi i një dokumenti të falsifikuar është vepër penale, nëse një qytetar kapet me biletë të falsifikuar do bëhet shoqërimi i tij dhe fillimi i një hetimi penal”.


Copyright © Gazeta “Si”


Më Shumë