.png)
Nga Gazeta ‘Si’- Virusi i Nilit Perëndimor, i cili transmetohet kryesisht nga pickimi i mushkonjave të infektuara, po shfaq një prirje në rritje në Greqi, sipas Organizatës Kombëtare të Shëndetit Publik të vendit.
Gjatë javës së fundit janë regjistruar 23 raste të reja. Që nga fillimi i sezonit të transmetimit në pranverë e deri më 5 gusht, numri total i rasteve ka arritur në 65.
Prej tyre, 54 pacientë kanë zhvilluar forma të rënda neurologjike, si encefaliti, meningjiti ose paraliza akute flakside, ndërsa 11 persona kanë pasur simptoma të lehta ose nuk kanë shfaqur dëmtime të sistemit nervor qendror.
Deri tani janë regjistruar gjashtë viktima, të gjitha mbi moshën 65 vjeç dhe me përfshirje të rëndë të sistemit nervor qendror.
Sipas autoriteteve shëndetësore greke, rastet e konfirmuara përfaqësojnë vetëm një pjesë të vogël të përhapjes reale të virusit në popullatë. Bazuar në të dhënat seroepidemiologjike, për çdo rast me komplikacione neurologjike vlerësohet se rreth 140 persona të tjerë janë infektuar, por kanë pasur simptoma të lehta ose kanë qenë plotësisht asimptomatikë.
Situata në Europë
Qarkullimi i virusit nuk kufizohet vetëm në Greqi.
Sipas Qendrës Europiane për Parandalimin dhe Kontrollin e Sëmundjeve (ECDC), deri më 29 korrik raste janë raportuar edhe në Itali, Rumani, Francë, Maqedoninë e Veriut, Spanjë dhe Gjermani.
Në total janë identifikuar 49 zona të prekura në shtatë vende europiane: 30 në Itali, tetë në Greqi, katër në Rumani, dy në Francë, dy në Maqedoninë e Veriut, dy në Spanjë dhe një në Gjermani.
Italia vijon të ketë numrin më të lartë të rasteve, me 94 të konfirmuara. Pas saj renditen Maqedonia e Veriut dhe Spanja me nga shtatë raste, Rumania me pesë, Franca me dy dhe Gjermania me një rast.
Zonat më të prekura në Greqi
Në Greqi, rastet janë regjistruar në 25 bashki të rajoneve të Atikës, Thesalisë dhe Maqedonisë Qendrore. Përqendrimi më i madh i infektimeve është raportuar në Atikë, ku autoritetet shëndetësore thonë se qarkullimi i virusit është veçanërisht intensiv këtë sezon.
Nga 65 pacientët e konfirmuar, 20 vazhdojnë të trajtohen në spital, 12 në pavijone të zakonshme dhe tetë në njësitë e kujdesit intensiv. Deri tani, 38 pacientë janë shëruar dhe kanë dalë nga spitali, një nuk ka pasur nevojë për shtrim, ndërsa gjashtë persona kanë humbur jetën./ Euronews
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje