.png)
Të jetosh pranë një rruge të ngarkuar, një linje hekurudhore apo një itinerari fluturimesh mund të ketë pasoja serioze për shëndetin e zemrës. Sipas një studimi të ri, ekspozimi i vazhdueshëm ndaj zhurmës së transportit lidhet me një rrezik më të lartë të problemeve kardiovaskulare, edhe te njerëzit që bëjnë gjumë normal.
Studiuesit e Spitalit të Përgjithshëm të Massachusetts në Boston analizuan të dhënat e më shumë se 100 mijë të rriturve, me një moshë mesatare prej 57 vjeç, duke i krahasuar ato me të dhënat zyrtare mbi nivelet e zhurmës së transportit.
Qëllimi ishte të kuptonin nëse ndikimi i zhurmës në shëndetin e zemrës ndryshonte në varësi të cilësisë dhe kohëzgjatjes së gjumit.
Rezultatet treguan se ekspozimi ndaj zhurmës mbi 50 decibel lidhej me një rritje prej 8 deri në 10% të rrezikut për zhvillimin e kolesterolit të lartë, tensionit të lartë të gjakut dhe diabetit.
Gjithashtu, personat që jetonin në mjedise me nivele më të larta zhurme kishin rrezik më të madh për probleme serioze të zemrës dhe enëve të gjakut. Këto lidhje u vunë re edhe pasi studiuesit morën parasysh faktorë si mosha, gjinia dhe cilësia e gjumit.
Lidhja më e fortë u vu re te kolesteroli i lartë, e ndjekur nga tensioni i lartë i gjakut dhe diabeti.
Gjumi i mirë nuk mjafton për të shmangur rrezikun
Një nga përfundimet më të rëndësishme të studimit ishte se gjumi i shëndetshëm nuk duket se e neutralizon ndikimin negativ të zhurmës në sistemin kardiovaskular.
“Zbulimi kryesor është se marrëdhënia midis ekspozimit ndaj zhurmës dhe sëmundjeve kardiovaskulare ishte e ngjashme si te njerëzit me gjumë të shëndetshëm, ashtu edhe te ata me probleme të gjumit”, shpjegoi autori kryesor i studimit, Joseph Nguyen.
Sipas tij, studiuesit prisnin që cilësia e gjumit të ndikonte në këtë marrëdhënie, por rezultatet treguan se zhurma mund të përbëjë një faktor rreziku të pavarur.
Hulumtimi i shtohet provave shkencore se faktorët mjedisorë, përfshirë ndotjen e ajrit, zhurmën, dritën artificiale dhe ndotësit kimikë, mund të ndikojnë ndjeshëm në shëndetin kardiovaskular.
Si mund të mbroheni nga zhurma?
Studiuesit sugjerojnë disa masa praktike për njerëzit që jetojnë në zona me zhurmë të vazhdueshme:
Instalimi i dritareve me xham të dyfishtë për të kufizuar depërtimin e zhurmës.
Zgjedhja e dhomave më të qeta të banesës për gjumin.
Përdorimi i tapave të posaçme për veshët gjatë natës.
Studimi nënvizon se zhurma e përditshme nuk është thjesht një shqetësim që ndikon në qetësinë dhe gjumin tonë. Ekspozimi i vazhdueshëm ndaj saj mund të lidhet edhe me probleme serioze shëndetësore, duke e bërë mjedisin ku jetojmë një faktor të rëndësishëm për shëndetin e zemrës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje