Gazeta Si - Një punonjës i Policisë Rrugore në Lezhë, me iniciale R.Xh., është pezulluar nga detyra, për shkak të sjelljes së tij në mënyrë joprofesionale me një turiste gjermane gjatë kohës që ishte në shërbim.
Më 10 qershor, te kryqëzimi i Tales, shërbimet e Policisë kanë ndaluar një automjet me drejtuese një shtetase gjermane, pasi kanë konstatuar se qarkullonte me njërën dritë të automjetit, të djegur.
Pasi i kanë komunikuar arsyen e ndalimit, polici ka konstatuar se gjermanja nuk dinte shqip dhe për këtë arsye komunikimin me të e kanë bërë nëpërmjet Google Translate.
Por edhe pasi shtetaset e huaja kanë pranuar të paguajnë gjobën, inspektori i policisë, ka vazhduar duke biseduar me to në shkelje të ligjit.
Ai i ka kërkuar drejtueses së mjetit Instagramin. Pasi janë bërë miq, i ka kërkuar gjithashtu të bëjnë një selfie dhe ta postojnë në Instagram, duke e etiketuar (tag).
Drejtori i Policisë së Shtetit, Rrumbullaku ka urdhëruar transferimin e mënjëhershëm të këtij punonjësi policie, nga Sektori i Policisë Rrugore në një strukturë tjetër të Policisë së Shtetit.
“Më datë 10.06.2024, te kryqëzimi i Tales, shërbimet e Policisë kanë ndaluar automjetin me drejtuese shtetasen gjermane J. W., pasi kanë konstatuar se qarkullonte me njërën dritë të automjetit, të djegur. Pasi i kanë komunikuar arsyen e ndalimit, shërbimet e Policisë kanë konstatuar se shtetasja nuk dinte shqip dhe për këtë arsye komunikimin me të e kanë bërë nëpërmjet Google Translate. Për shkeljen e kryer (qarkullim me të meta teknike pamore), të parashikuar nga neni 79 i Kodit Rrugor, shtetasja J.W. është ndëshkuar me masë administrative 1000 lekë”, njofton policia.
Turistja gjermane ka pranuar të paguajë gjobën në çast (në dorë) dhe për këtë arsye, masa administrative është përgjysmuar në 500 Lekë. Këto veprime janë të dokumentuara me fletën e masës administrative dhe me mandatin e arkëtimit për pagesën e bërë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.