.png)
Nga Gazeta ‘Si’ - Drejtori i Zyrës për Kosovën në Serbi, Petar Petkoviç, tha sot se kryeministri i Kosovës Albin Kurti po mashtron bashkësinë ndërkombëtare se janë arrestuar pesë policë nga Kosova.
Sipas tij Kurti është fajtor për çdo tension në Kosovë.
“Gënjeshtari së bashku me pasardhësin e tij Xhelal Sveçla po përhapin gënjeshtra se pesë persona nga Kosova dhe Metohia janë arrestuar. Krimineli i korruptuar Kurti le të mos mashtrojë ndërkombëtarët dhe mbarë publikun sepse të pavërtetat e tij janë aq transparente saqë çdo inteligjent e ka të qartë se ato janë ekskluzivisht produkt i urrejtjes ndaj serbëve në Republikën e Kosovës dhe presidentit Aleksandar Vuçiç”, deklaroi ai ndërsa shtoi se sipas tij Kurti është krimineli më i madh në Ballkanin Perëndimor.
“Fillimisht i vuri zjarrin Kosovës dhe Metohisë me politikën e tij destruktive dhe të dhunshme, ndërsa tani dëshiron t'i vërë flakën Maqedonisë së Veriut, Malit të Zi dhe gjithë rajonit me politikën e tij shovinist”, shtoi ai.
Në mesin e të ndaluarve në kufi nga Serbia ditën e djeshme ishin edhe disa zyrtarë policorë. Autoritetet thanë se ata janë liruar, ndërkaq ndaj Jankoviçit, zv-drejtori i policisë së Kosovës, Serbia ka caktuar masën e paraburgimit prej 48 orësh nën akuzën për prishje të rendit kushtetues të Serbisë.
Kosova ka akuzuar Serbinë se me veprimet e fundit ka kryer shkelje të rëndë të të drejtave të njeriut dhe ka shkelur marrëveshjet e arritura në dialog, që ndërmjetësohet nga Bashkimi Evropian.// Tanjug
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
