.png)
Gazeta Si – Prokuroria e Posaçme do të bjë rekurs në Gjykatën e Lartë kundër lirimit nga burgu të Jamarbër Malltezit nga Gjykata e Posaçme e Apelit, i akuzuar për korrupsion dhe pastrim parash për dosjen “Partizani”.
Një ditë më parë, Apeli i GJKKO-së, vendosi të nxjerrë nga qelia Malltezin, duke zbutur masën e sigurisë nga “arrest në burg”, në “arrest në shtëpi”.
Sipas vendimit të Apelit të Posaçëm, Malltezi urdhërohet të mos largohet nga banesa e tij dhe të mos komunikojë me persona të tjerë me përjashtim të atyre që banojnë me të.
Gjyqtarja Ilirjna Olldashi, argumentoi për dhënien e vendimit se Malltezi nuk mund të prishë provat dhe nuk ka rrezik të largohet jashtë vendit.
Ndërkohë që prokurorët e SPAK-ut, kërkojnë qëndrimin në burg të Malltezit, pasi sipas tyre nuk ka ndryshuar asnjë rrethanë.
Nga ana tjetër, një postim i bërë në rrjetet sociale nga dhëndri i ish-kryeministrit pas lirimit nga burgu, ka çuar SPAK-un të kryejë verifikime, nëse vendimi i Gjykatës së Apelit, që ndër të tjera detyron Malltezin mos të ketë kontakte me asnjë person, është duke u respektuar apo jo.
Vendimi i gjyqtares Olldashi, shënon rastin e parë që një i pandehur i akuzuar për korrupsion pasiv nga SPAK, i zbutet masa e sigurisë pas apelimit.
Në sallën e gjyqit, siç u bë e ditur nga publikimi i fjalës së tij të plotë pas lirimit nga qelia e paraburgimit, 1 muaj pasi u vendos në pranga, Malltezi ishte shprehur se vetja i dukej si në gjyqet politike të vitit 1945, ku pronarët ishin armiqtë e pushtetit popullor.
Jamarbër Malltezi akuzohet për pastrim parash dhe korrupsion për çështjen e privatizimit të ish-klubit sportiv “Partizani”.
SPAK thotë se ai ka përfituar 5.4 milionë euro gjatë këtyre procedurave, i favorizuar nga ish-kryeministri Sali Berisha.
Ndërsa ky i fundit akuzohet për korrupsion pasiv. Nën hetim për këtë rast është edhe biznesmeni Fatmir Bektashi.
Pasi liroi nga burgu Malltezin, Apeli la në fuqi masën “detyrim paraqitje” për ish-kryeministrin Sali Berisha, i akuzuar dhe nën hetim për aferën e klubit sportiv “Partizani”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
