.png)
Gazeta Si – Dyshimi se keniania Joy Ayoko i jepte informacione një klienti në kazino, i cili kishte fituar shuma të mëdha parash, është pista e re e ngritur nga prokuroria për vdekjen e 22-vjeçares.
Sipas burimeve paraprake, hetuesit dyshojnë se e reja që punonte si krupiere në një kazino në Tiranë, bashkëpunonte me një lojtar, duke i treguar mënyrën se si të luante për të qenë fitues. Pista e re e prokurorisë e ngritur së fundmi, mund t’i ndihmojë hetuesit për të zbardhur ngjarjen.
LEXO EDHE:
– Vdekja e kenianes Joy Ayoko, shoqërohen në polici 6 persona. Kontrolle në disa banesa në Tiranë
– Aktivistët kërkojnë drejtësi për kenianen, lyejnë me ‘gjak’ hyrjen e Prokurorisë së Tiranës
– Dhunimi i 22-vjeçares, drejtues të ambasadës keniane në Romë takim me shefin e komisariatit 1 në Tiranë
– Vdekja e Joy Ayokos, dyshohet se bashkëpunoi me një klient të kazinosë për të fituar shuma të mëdha parash
– Vdekja e 22-vjeçares nga Kenia, shoqërohet në polici shoferi i kazinosë
Ka dyshime të forta që manovrat e kenianes dhe lojtarit në fjalë, të jenë zbuluar nga stafi i kazinosë dhe kjo gjë të jetë bërë shkak për ngjarjen e rëndë.
Burime në rrugë jo zyrtare, shprehen se lojtari fitues është identifikuar nga policia dhe pritet te merret në pyetje.
Në lidhje me këtë pistë, të shtunën e kaluar u shoqëruan në polici 6 persona, të cilët u morën në pyetje, mes tyre edhe shoferi i kazinosë, i cili dyshohet të ketë pasur dhe lidhje intime me Joy-n.
E reja punonte në një kazino të Tiranës, ku jetonte prej kohësh së bashku me disa shoqe të saj gjithashtu nga Kenia.
Nëna e vajzës keniane, u njoftua nga kompania e kazinosë që vajza e saj kishte përfunduar në spital.
Shoqet e dhomës kanë dhënë dëshmi kontradiktore me njëra tjetrën, e ndërsa i dyshuar ka qenë edhe shoferi i kazinosë. Rodi Barci, 32 vjeç, ka deklaruar se ka qenë i lidhur me Joy-n, por në momentin kur ka ndodhur ngjarja, kanë qenë të ndarë dhe nuk kishin më lidhje me njëri tjetrin.
Ayoko, 22-vjeçe, u gjet në gusht të vitit 2022 e dhunuar, ku nga keqtrajtimi ajo ra në koma për 6 muaj. Në shkurt të këtij viti, për shkak të komplikacioneve, ajo ndërroi jetë në Kenia në një spital. Për shkak të gjendje së rëndë, e reja nuk u mor dot në pyetje nga grupi hetimor në Shqipëri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
