Kredia në euro vijoi rritjen edhe gjatë 2022-shit.
Të dhënat nga Banka e Shqipërisë tregojnë se gjatë vitit të shkuar sektori bankar dha 1.175 mld euro kredi të reja në valutën europiane, duke shënuar nivelet më të larta në shtatë vitet e fundit.
Rritja krahasuar me një vit më parë është 16.8%.
Sipas kohëzgjatjes së kredisë, peshën më të lartë në portofol e ka kredia afatgjatë me maturim mbi pesë vjet, që përbënte mbi 45% të totalit, ndërsa pjesa e mbetur ndahej mes maturitetit afatshkurtër dhe atij afatmesëm.
Nga ana tjetër, kredia e re në lekë pësoi sërish rënie vitin e kaluar, me 2%, për një vlerë totale disbursimesh prej 133.4 miliardë lekësh.
Sipas BSH-së, depozitat në valutën europiane u rritën me 17% vitin e kaluar, ndërsa depozitat në lekë rezultuan në stanjacion.
Një faktor tjetër që ka favorizuar kreditë në euro janë edhe normat më të ulëta të interesit.
Vitin e kaluar Banka e Shqipërisë dhe Banka Qendrore Europiane nisën rritjen pas më shumë se një dekade të normave të interesit.
Kjo u reflektua në rritje të interesave të kredisë për të dyja monedhat, por për lekun rritja e interesave ishte më e ndjeshme. Norma mesatare e huave të reja të dhëna për sektorin privat gjatë vitit 2022 ishte 4.37%, ndërsa i njëjti tregues për lekun rezultoi 6.59%.
Aktualisht norma e interesit në Shqipëri është 2.75%.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
