.png)
Nga Gazeta ‘Si’- Popullsia globale e individëve me pasuri të lartë (HNWI) u rrit me 7.9% në vitin 2025, duke arritur në 25.3 milionë persona në mbarë botën.
Pasuria e tyre totale u rrit me 8.7%, duke kapur një rekord prej 98.3 trilionë dollarësh (86.2 trilionë euro), rritja më e madhe vjetore që nga viti 2018, sipas raportit “World Wealth Report” të Capgemini.
Por çfarë po e nxit këtë rritje të pasurisë? A po përfitojnë edhe europianët dhe çfarë ndikimi ka shtimi i super të pasurve në ekonominë e vendeve?
Çfarë quhet individ me pasuri të lartë?
Një individ me pasuri të lartë (HNWI) është dikush që zotëron më shumë se 1 milion dollarë pasuri të investueshme, pa përfshirë shtëpinë e tij.
Kategoritë kryesore janë:
- 1–5 milionë dollarë: milionerë të zakonshëm
- 5–30 milionë dollarë: milionerë të nivelit të mesëm
- Mbi 30 milionë dollarë: individë me pasuri shumë të lartë (UHNWI)
Këta të fundit përbëjnë vetëm rreth 1% të popullsisë së pasur, por kontrollojnë 34.8% të pasurisë totale në botë.
A po pasurohen milionerët europianë?
Po. Sipas Capgemini, Europa ka rreth 6 milionë individë me pasuri të lartë, një rritje prej rreth 6.5% krahasuar me vitin 2024. Pasuria e tyre u rrit ndjeshëm, nga vetëm 0.7% rritje në vitin 2024 në 8% në vitin 2025.
Megjithatë, rritja nuk është e njëjtë në të gjithë kontinentin.
Luksemburgu shënoi një nga rritjet më të mëdha, me 13.5% më shumë persona të pasur, i ndjekur nga Gjermania me 11.1%, Belgjika me 9%, ndërsa Franca dhe Britania e Madhe patën rritje më modeste, përkatësisht 2.7% dhe 2.6%.
Ku po i investojnë të pasurit paratë?
Ndërsa numri i të pasurve rritet, po ndryshon edhe mënyra se si ata përdorin pasurinë e tyre.
Sipas Gareth Wilson, zv.president ekzekutiv i Capgemini, individët me pasuri të lartë po largohen gradualisht nga mbajtja e parave cash dhe po orientohen më shumë drejt aksioneve dhe investimeve me të ardhura fikse.
Kjo do të thotë investime me potencial më të lartë fitimi, por edhe me rrezik më të madh.
Ekspertët argumentojnë se kjo mund të jetë pozitive për ekonominë, pasi investimet e të pasurve mund të nxisin rritjen e tregjeve financiare dhe sektorëve të ndryshëm.
Sektorë si mbrojtja dhe energjia kanë përfituar veçanërisht në Europë. Indeksi gjerman DAX u rrit me gati 22% në vitin 2025, i ndihmuar nga kompani si Rheinmetall dhe Siemens Energy, ndërsa sektori minerar dhe i mbrojtjes kontribuoi në rritjen me 21.5% të indeksit britanik FTSE 100.
Sipas Capgemini, politikat e Bankës Qendrore Europiane për normat e interesit dhe fokusi në inovacion kanë krijuar një klimë më të favorshme për investime, duke ndikuar edhe në rritjen e pasurisë së individëve më të pasur/ Euronews eu
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje