Shumë njerëz konsumojnë pjesën më të madhe të kalorive të tyre gjatë ditës, duke shmangur mëngjesin për shkak të ditëve të ngarkuara të punës dhe mëngjeseve të shkollës dhe ekspertët kanë menduar prej kohësh se ngrënia vonë shkakton shtimin në peshë ose pengon humbjen e peshës.
“Ju duhet të hani lehtë gjatë darkës dhe ta bëni mëngjesin vaktin tuaj më të madh”, ka treguar një studim i mëparshëm, për t’i dhënë trupit tuaj kohë për të djegur kaloritë e tepërta gjatë gjithë ditës.
“Argumenti mbizotërues është se ngrënia e më shumë kalorive më herët “ndryshon metabolizmin” në mënyra që favorizojnë humbje më të madhe të peshës”, thotë David Katz, themelues dhe ish-drejtor i Qendrës Kërkimore të Parandalimit të mbipeshës në Amerikë.
Megjithatë, ngrënia e një mëngjesi të madh në vend të një vakti më të madh më vonë gjatë ditës nuk ndikoi në humbjen e peshës, sipas një sprove të re klinike që krahasoi njerëzit që hanë shumicën e kalorive ditore në mëngjes me ata që hanë më shumë në darkë.
“Me kalori të ngarkuara në mëngjes ose në mbrëmje, studiuesit gjetën humbje peshe pothuajse identike”, tha Katz, i cili nuk ishte i përfshirë në studim. Përveç kësaj, “çdo efekt magjik” i të ngrënit të hershëm në metabolizmin e trupit u hodh poshtë, tha ai, duke e përshkruar hulumtimin si “jashtëzakonisht rigoroz”.
“Kështu, ky studim hedh poshtë pretendimin se ngrënia e hershme ndryshon metabolizmin në një mënyrë që favorizon humbjen më të madhe të peshës”, tha Katz.
Studimi është botuar të premten në revistën Cell Metabolism. Njerëz mbipeshë ose obezë kaluan katër javë duke ngrënë 45% të kalorive të caktuara në vaktin e mëngjesit, 35% në drekë dhe 20% në darkë. I njëjti grup më pas kaloi në katër javë kur vakti i mbrëmjes ishte më i lartë në kalori: 20% në mëngjes, 35% në drekë dhe 45% në darkë.
“Pjesëmarrësve iu siguruan të gjitha vaktet e tyre për tetë javë”, tha në një deklaratë bashkëautorja e studimit Alexandra Johnstone.
Hulumtime kontradiktore
Megjithatë, kishte disa lajme të mira për ata që hanë mëngjes të bollshëm. Ngrënia e një vakti të bollshëm në mëngjes mund të ndihmojë në frenimin e oreksit tuaj, zbuloi studimi.
“Ne e dimë se kontrolli i oreksit është i rëndësishëm për të arritur humbjen e peshës dhe studimi ynë sugjeron që ata që konsumonin më shumë kalori në mëngjes ndjeheshin më pak të uritur, ndryshe nga kur konsumonin më shumë kalori në mbrëmje”, tha Johnstone.
Ushtrimet aerobike janë mënyra më efikase për të djegur kalori, por edhe stërvitjet e forcës janë gjithashtu të rëndësishme, thonë ekspertët. Kjo për shkak se muskujt djegin më shumë kalori sesa yndyra, si në pushim ashtu edhe gjatë ushtrimeve.
Hulumtimet e mëparshme, të kryera me grupe më të mëdha njerëzish për periudha më të gjata kohore, kanë gjetur se njerëzit që ngarkohen me kalori në mëngjes humbin peshë. Është e mundur që tetë javë të mos ishin të mjaftueshme që humbja e peshës të shihet në hulumtimin e ri, thanë autorët e studimit, ose që studime të tjera mund të mos kenë matur përbërjen e trupit dhe shpenzimin e energjisë në të njëjtën mënyrë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
