Bregdeti i Greqisë po zhduket për shkak të ndryshimeve klimatike

Plazhet spektakolare, stili i jetesës mesdhetare dhe ushqimi i mrekullueshëm janë disa nga arsyet pse miliona njerëz udhëtojnë për në Greqi çdo vit.

Vendi ka qenë një nga destinacionet më të njohura të Europës që nga vitet 1950, në të njëjtën dekadë kur udhëtimi në ishull u bë një përvojë e domosdoshme për turistët.

Me gati 15,000 kilometra vijë bregdetare, Greqia ka opsione për çdo shije dhe çdo buxhet, pavarësisht nëse ju pëlqen një plazh më i qetë, që nuk frekuentohet shumë apo nëse doni një vend ku mund të kërceni gjithë natën.

E megjithatë, kjo parajsë mesdhetare mund të mos jetë për shumë më gjatë. Gati një e treta e vijës bregdetare të Greqisë po gërryhet. Dhe ndërsa erozioni i bregdetit është një fenomen natyror, ndryshimet klimatike po e përshpejtojnë atë me një ritëm të madh.

Shkencëtarët vlerësojnë se ngrohja globale do të shkaktojë erozionin e 36,097 kilometrave të zonave ranore në mbarë botën në 30 vjet, nëse temperaturat vazhdojnë të rriten me këtë ritëm. Vija bregdetare globale arrin në 356,000 kilometra, sipas vlerësimeve, kështu që do të ishte një humbje prej 10 për qind.

Bregdeti rreth Santorinit pritet të humbasë 150 metra nga erozioni bregdetar deri në vitin 2100.

Një pjesë e madhe e plazheve me rërë të botës tashmë po gërryen. Në vitin 2021, Agjencia Europiane e Hapësirës krahasoi imazhet satelitore të vijës bregdetare greke nga viti 1995 deri në vitin 2020, duke zbuluar se pothuajse 10 për qind e 900 kilometrave të tokës së studiuar ishin tërhequr me më shumë se tre metra çdo vit.

Ekspertët kanë frikë se pothuajse gjysma e të gjitha plazheve të tilla mund të jenë afër zhdukjes deri në fund të shekullit, siç përmendet në një studim nga Qendra e Përbashkët Kërkimore e Komisionit Europian.

Greqia është jashtëzakonisht e ekspozuar ndaj erozionit bregdetar, i cili pritet të ndryshojë thellësisht vijën bregdetare të vendit në 80 vitet e ardhshme. Në fakt, disa nga pikat e preferuara të pushimeve në botë, nga Santorini në Mykonos, mund të mos jenë të njëjta deri në vitin 2100, tregoi një hulumtim nga kompania e udhëtimeve luksoze Unforgettable Greece.

Kompania ka përdorur Photoshop për të krijuar foto para dhe pas që tregojnë erozionin bregdetar.

Fari egjiptian i Chania mund të zhytet plotësisht në 80 vjet.

Vija bregdetare pritet të tërhiqet në mënyrë të rrezikshme pranë ndërtesave ikonike të Santorinit, pasi 150 metra bregdet rreth Firas pritet të zhduken nga deti.

Plazhi Myrtos, i konsideruar si një nga plazhet më të bukura në të gjithë planetin, mund të zhduket plotësisht pasi të largohen 300 metra vijë bregdetare.

Fari egjiptian i Chanias në Kretë, një tjetër simbol ikonik i Greqisë, do të zhduket gjithashtu deri në fund të shekullit nëse temperaturat vazhdojnë të rriten.

Turistëve mund t’u duhet t’i thonë lamtumirë qytetit të njohur Mykonos.

Venecia e vogël në Mykonos mund të pushojë së ekzistuari, pasi deri në 195 metra erozion bregdetar do të shkatërrojë një pjesë të madhe të qytetit në më pak se 80 vjet.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.