Shqipëria merr 60 mln euro borxh për pagat e orëve shtesë, punësimet e reja në spital dhe blerjen e vaksinave

Shqipëria gjendet në vështirësi financiare për të paguar staf të ri mjekësor në spitalet covid si dhe të paguajë orët shtesë për mjekët dhe infermierët që janë në vijën e parë të frontit anti covid dhe për blerjen e vaksinave të reja , sidomos tani që ka nisur aplikimi i dozës së tretë .

Komisioni për Punën, Çështjet Sociale dhe Shëndetësinë, I dha sot miratimin qeverisë që të përdor një hua prej 60 milionë euro të premtuar nga Banka për Zhvillim të Këshillit të Evropës.

Në seancë ishte edhe zv/ministrja e Shëndetësisë dhe Mbrojtjes Sociale Eugena Tomini, zv/ministrja e Financave dhe Ekonomisë Adela Xhemali dhe përfaqësues të tjerë nga dy ministritë përgjegjëse.

Zonja Tomini iu tha deputetëve se shuma prej 60 mln euro do të ndihmojë në fuqizimin e sistemit shëndetësor për rritjen e kapaciteteve për trajtimin e rasteve të COVID-19 dhe sëmundjeve që lidhen me të, sigurimin e vaksinës së COVID-19 për mbrojtjen e popullatës nga rreziqet e COVID- 19.

“Ndërsa zv/ministrja e Financave, Adela Xhemali sqaroi se, nëpërmjet huasë 60 milionë euro do të financohen shpenzimet buxhetore për përballimin e situatës së krijuar nga pandemia e COVID-19.

Por relatorja e projektit Ilda Dhori, tha se ndryshe nga ccfarë ishte deklaruar si prioritet i buxhetit të Shëndetësis, ky fond prej 60 milion eurosh do të përdoret për punësim të personelit mjekësor shtesë, doktorë, infermierë dhe ndihmësinfermierë si dhe fondet e nevojshme për pagat e punës jashtë orarit për personelin mjekësor dhe jomjekësor, që shërbejnë në institucionet shëndetësore të trajtimit të pacientëve me COVID-19, blerje e pajisjeve mjekësore, sigurimi i produkteve farmaceutike të domosdoshme, si barna mjekësore, kitet diagnostikuese për koronavirus etj, sigurimi i materialeve të tjera mjekësore, si maska, doreza dhe dizinfektantë, sigurimi i pajisjeve mbrojtëse personale për punonjësit e kujdesit shëndetësor; rehabilitimi dhe përshtatja e spitaleve, blerja e vaksinave të COVID-19.

Shlyerja e huasë së akorduar nëpërmjet kësaj marrëveshjeje do të bëhet brenda 15 viteve.

Në realcion shpjegues thuhet se kjo hua nuk do të shkaktojë efekte të tjera buxhetore shtesë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.