.png)
Raporti i kredive vijoi rënien në muajin shtator ku sipas të dhënave nga Banka e Shqipërisë, ky tregues ra në 6.5%, nga 6.9% që kishte qenë një muaj më parë.
Shtatori ka shënuar nivelin më të ulët të kredive me probleme i regjistruar që prej nëntorit të vitit 2008.
Deri tani, ecuria e raportit të kredive me probleme po shfaqet dukshëm më e mirë se parashikimet.
Mosrritja e raportit të kredive me probleme tregon se masat e përkohshme e kanë arritur qëllimin e tyre, që ishte dhënia e kohës së mjaftueshme që gjendja financiare e huamarrësve të rimëkëmbej nga pasojat e pandemisë.
Kur ekonomia u prek nga efektet e pandemisë, Banka e Shqipërisë parashikonte në analizat e saj të brendshme se raporti i kredive me probleme mund të rritej deri në 15%.
Për tremujorin e dytë të këtij viti, Prodhimi i Brendshëm Bruto u rrit me 17.9% dhe tejkaloi nivelet e vitit 2019, para pandemisë.
Guvernatori i Bankës së Shqipërisë, Gent Sejko, tha këtë javë se portofoli i kredisë bankare u rrit me 8.9% në fund të tremujorit të tretë të këtij viti, i diktuar nga zgjerimi i kredisë në lekë, i kredisë për qëllime investimi dhe i asaj për blerje banese.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
