Gjykata Kushtetuese do të marrë në shqyrtim së shpejti kërkesën e Kuvendit të Shqipërisë për shkarkimin e Presidentit të Republikës Ilir Meta nga posti i tij.
Në njoftim, Kushtetuesja thekson se çështja do të kalojë në seancë publike, ndërsa data e saj do të caktohet në përputhje me rregullat proceduriale të Gjykimit Kushtetues.
Në seancën plenare të 9 qershorit të këtij viti, Kuvendi vendosi shkarkimin e Metës me 104 vota pro, 7 kundër dhe 3 abstenim.
Tashmë do të jetë Gjykata Kushtetuese ajo që do të shprehet nëse gjetjet e Komisionit Hetimor për Metën përbëjnë shkelje të Kushtetutës.
Meta është presidenti i parë në historinë e Shqipërisë që ndëshkohet me votë nga deputetët pas nismës së 55 deputetëve socialistë dhe hetimeve nga Komisioni i Posaçëm, pjesë të cilit ishin edhe deputetët e opozitës parlamentare.
Sipas akuzave të socialistëve, Meta ka qenë përgjegjës për nxitjen e konfliktit me deklaratat e tij para dhe pas zgjedhjeve të 25 prillit të këtij viti.
Tani, vendimi përfundimtar i mbetet Gjykatës Kushtetuese. Për largimin e Metës nga detyra, nevojiten 5 vota të anëtarëve të kësaj gjykate.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
