.png)
Dëmi ekonomik i shkaktuar nga institucionet shtetërore përgjatë vitit të kaluar, sipas Kontrollit të Lartë të Shtetit shkon në rreth 18 milionë euro.
Kreu i KLSH-së, Arben Shehu raportoi në seancën plenare të Kuvendit këtë të enjte. Ai tha se institucioni që drejton ka përmbushur rekomandimet e Kuvendit për vitin e kaluar për auditimin e institucioneve.
“Kontrolli i Lartë i Shtetit për vitin 2020 kishte planifikuar gjithsej 143 auditime, ku kanë përfshirë vlerësimin e aktivitetit në 91 subjekte. Ato kanë përfshirë, institucione qendrore, ministri dhe agjenci, njësi të vetëqeverisjes vendore, drejtori të përgjithshme të administrimit fiskal, etj. Nga këto 14 auditime në institucionet e qeverisjes qendrore, 18 në institucione të vetëqeverisjes vendore dhe njësi të tjera në nivel vendor, 10 auditime në institucione të tjera financiare”, tha kreu i KLSh-së.
Shehu prezantoi bilancin e këtyre auditimeve.
“Rezultatet e punës audituese të vitit 2020 kanë pasur objektiv edhe identifikimin e shkeljeve dhe raportimin e tyre në bazë të klasifikimit si dëm ekonomik dhe si parregullsi/paligjshmëri me efekte negative në financat publike nga subjekteve nën auditim, ku parregullsi dhe shkelje financiare, në të ardhurat dhe në shpenzimet e kryera, me dëm ekonomik në shumën totale rreth 17.7 milionë euro”, tha Shehu.
Në Kuvend raportoi edhe Inspektoriati i Lartë i Deklarimit dhe Kontrollit të Pasurive. Drejtuesja e këtij institucioni, Evgjeni Bashari tha se për 2020 nga inspektimi i zyrtarëve të nivelit të lartë janë referuar 72 raste në polici dhe janë vendosur 33 gjoba.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
