.png)
Përgjatë pandemisë, sektori i pasurive të paluajtshme shënoi rritje të konsiderueshme ndryshe nga shumë sektorë të tjerë.
Te ardhurat e Tatimit mbi të Ardhurat Personale (TAP) nga shitja e pasurive të paluajtshme u rritën me 34% në vitin 2020.
Drejtoria e Përgjithshme e Tatimeve raportoi se të ardhurat nga TAP mbi shitjen e pasurive të paluajtshme ishin 3,6 miliardë lekë në vitin 2020 me një rritje 34.4% në raport me vitin 2019. Arkëtimet nga shitja e pasurive të paluajtshme zunë 10% të totalit te të ardhurave nga TAP më 2020.
Zëri i dytë me rritjen më të madhe ishin arkëtimet e TAP nga deklaratat individuale. Të ardhurat nga ky zë arritën në 502 milionë lekë me një rritje vjetore 37%. Këto arkëtime zënë vetëm 1.3 për qind te të ardhurave totale nga TAP.
Të ardhurat totale nga TAP shënuan tkurrje vjetore me rreth 20% në vitin 2020.
Në këtë tendencë ndikuan arkëtimet nga dividendi me rënie me 79% pasi në vitin 2019 ky zë u ndikua pozitivisht nga ulja e dividendit nga 15 në 8%, me efekt prapaveprues edhe për vitet e mëparshme.
Edhe pse në një vit pandemik, pagat nuk pësuan ndryshime shumë të mëdha.
Arkëtimet e TAP nga pagat ishin rreth 22 miliardë lekë me një rënie vetëm 1.7% në raport me një vit më parë dhe zënë 59% te të ardhurave totale nga TAP.
Rënia më e madhe në zërat e TAP u vu re në mbi interesat dhe mbi qiratë përkatësisht me 4.8 dhe 5.4%.
Tatimi mbi të ardhurat personale është programuar 41.1 miliard lekë dhe është realizuar 37.1 miliard lekë, me një mosrealizim prej 4.0 miliard lekë ose 9.76 % më pak.
Krahasuar me të njëjtën periudhë të vitit të kaluar, në të cilin u arkëtuan 46.2 miliard lekë, të ardhurat nga ky lloj tatimi janë realizuar 9.2 miliard lekë më pak ose 19.81% më pak.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
