Vetëm pak minuta pasi Mark Marku u zyrtarizua nga PD-ja për të drejtuar qarkun e Lezhës në zgjedhjet e 25 Prillit, kryeministri Edi Rama, përmes një video ironizuese, hodhi shashkën se Marku ishte kandidati i PD-së për Ministër i Arsimit.
Në një intervistë për “News 24”, Mark Marku u pyet nëse ishte kjo arsyeja se pse ai pranoi ftesën e Lulzim Bashës.
“Çfarëdo lloj pozicioni, pushteti në thelb nuk më josh më, e kam treguar kur kam qenë deputet që s’kam bërë kompromise për shkak të pushtetit, kam treguar që jam i ç’interesuar në kuptimin praktik të pushtetit.
Njerëzit do kenë aktet e mia që do tregojnë që s’ka qenë pushteti joshja ime, do e kuptojnë me aktet e mia gjatë gjithë kohës që unë se kam këtë, nuk më thotë asgjë kjo”, u përgjigj ai.
Po pse ai pranoi ofertën në një kohë që as e aspironte deri do muaj më parë?
“E kam menduar gjatë. E kam pasur pak të vështirë për të marrë këtë vendim. Në kushte të tjera s’do e merrja këtë vendim. Realisht po them që nuk kam pasur aspirata të kthehem në jetën politike apo parlamentare për arsyen se ndihem shumë mirë ashtu siç jam e ku jam. Duket pak si retorikë por mendoj që është një moment shumë delikat për vendin, nevojë imediate për tu bashkuar e për të fituar zgjedhjet PD, opozita e gjithë forcat opozitare që ta kalojmë këtë moment delikat, është një nevojë që lind për rrethanat që qeverisja e Ramës na ka çuar në zgrip, ka çuar vendin në limitet e fundit të asaj që mund të durojë një vend nga një qeverisje 8 vjeçare me një lider si Edi Rama që ka shfaqur shenja të rrezikshme të pushtetit devijim të jashtëzakonshëm, duke çuar vendin drejt kontrollit të gjithë pushteteve, arrogant, e tentativë për të zhdukur çdo vatër rezistence demokratike brenda një vendi gjysmë demokratik siç është Shqipëria, për këtë e kam marrë vendimin”, tha ai.
.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
