Edhe këtë fundjavë, zonat e kuqe do të jenë në karantinë. Sot dhe nesër në zonat e kuqe lejohen që të dalin pensionistët dhe prindërit me fëmijë deri në moshën 14-vjeç. Pensionistët lejohen të dalin deri në orën 10:00, ndërsa prindërit me fëmijët deri në 14 vjeç lejohen të dalin nga ora 11:00 deri në orën 17:30 të pasdites. Sot do të qëndrojnë hapur vetëm ushqimoret dhe farmacitë deri në orën 17:30. Të dielën të gjitha mbyllur. Sot dhe nesër do të ndalohet kategorikisht qarkullimi i automjeteve private. Ndërkohë që nga e hëna nuk do të ketë më fasha orari në zonat e gjelbra.
Bashkitë që janë në zonën e kuqe: Tirana, Durrësi, Shkodra, Kurbini, Kruja dhe Fieri. Pjesa tjetër e bashkive të gjelbra janë me rregulla të reja, aktualisht lejohet lëvizja deri në 21:00 dhe nuk ka nevojë për autorizime.
Kryeministri Edi Rama njoftoi se nga hëna do të ndalohen vetëm 4 aktivitete, transportit publik, aktivitetet sportive, kulturore dhe argëtuese! Pjesa tjetër do të jenë të gjitha hapur, sigurisht duke zbatuar protokollin e sigurisë. Baret dhe restorantet që do të hapen të hënën, do të lejohen të shfrytëzojnë vetëm hapësirën e jashtme, ku krijohet mundësia për respektimin e masave dhe mbi të gjitha të distancimit social.
Për këtë dhe pensionistët ka shkruar sot edhe kryeministri Rama, i cili ndër të tjera ka shpërndarë edhe një video nga qyteti i Tiranës ku duken të moshuarit që kanë mbushur parqet.
Rama në videon e shpërndarë shkruan: “Sa shumë shembuj qytetarie prej tyre në ditë të vështira e sa shumë borxhe për ta sot e gjithmonë.”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
