.png)
Sabina Veizaj-Në Pogradec kontrolli i Inspektoriatit të Punës i dërgoi në shtëpi 80 punëtorë të një fasonerie që janë gjetur pa maska, por në farmacitë e vendit nuk gjenden më maska.
Në Tiranë, punonjës të një fasonerie tjetër nuk pranojnë të hyjnë pa mjete mbrojtëse. Biznesi po gjendet tërësisht i papërgatitur dhe konfuz me çfarë po ndodh pas marrjes së masave drastike sipas tyre të qeverisë, të pashoqëruara nga një paketë e mundshme mbështetëse.
Florian Zekja nga Unioni i Fasonëve thotë se vështirësitë po thellohen dita-ditës.
“Ne i kemi dërguar në shtëpi punonjësit mbi 60 vjeç. Kemi përpiluar një formular si të policisë. Kemi krijuar distancë nga punonjësi në punonjës 2 metër, maska nuk ka, kemi rritur higjenën duke vendosur dezifektant në çdo tavolinë dhe ashensori pastrohet herë pas herë. Këto janë masat tona, nga qeveria nuk ka asnjë lajm’- shprehet Zekja për gazetën “Si”.
Ai tregon i shqetësuar se me ndalimin e transportit “që sot kemi mungesa punonjësish, që sigurisht nuk do të mund t’i paguajmë sepse nuk kemi mundësi. I tutemi minutës tjetër sepse situata po ndryshon me minuta”- thotë Zekja.
Nikolin Jaka, kreu i Dhomës së Tregtisë dhe Industrisë thotë se punonjësit të frikësuar po braktisin supermarketet dhe pronarët e tyre janë në panik sepse nuk do të mund të furnizojnë dot popullatën dhe njëkohësisht do t’u bllokohet puna.
Mbyllja e lokaleve, restoranteve është masë e parakohshme për Jakën në një kohë kur nuk është shoqëruar me masa mbështetëse për të ndihmuar biznesin.
Dhoma e Tregtisë dhe Industrisë Tiranë ka gati kërkesat për qeverinë dhe e cilëson situatën që po krijohet me vendimarrjen e qeverisë në lidhje me emergjencën drastike për momentin, të cilat po fundosin biznesin.
Ndër kërkesat e Dhomës së Tregtisë dhe Industrisë që i janë dërguar qeverisë janë rimbursimi për bizneset e mbyllura, shtyrja e pagesës së kredive pa interesa deri në muaj si fillim, mospagimi i tatim-taksave 3-6 muaj për një periudhë dhe sigurimet shoqërore.
Jaka sugjeron hartimin e një strategjie emergjence dhe ekspertët të bëjnë analizën e humbjeve dhe të aplikojnë pranë FMN-së për të përfituar nga fondi 50 mld euro që institucioni ndërkombëtar ka vënë në dispozicion për të prekurit nga Koronavirusi.
“Nuk duhet të ngjallim panik dhe të krijojmë anarki”- thotë Jaka.
Edhe turizmi, një nga sektorët të cilësuar si nga më të prekurit, kërkon mbështetje nga qeveria.
ATOA- Shoqata Shqipatre e Turoperatorëve dhe Agjencive Turistike i kërkon qeverisë: Të shtyjë pagesën e tatimtaksave, sigurimeve shoqërore dhe kreditë.
Në fakt burime pranë sektorit bëjnë me dije se shoqatat e truizmit nuk po bien dakord me njëra-tjetrën për kërkesa të unifikuara drejtuar qeverisë, sepse një grup prej tyre duan kërkesa shtesë.
“Shtyrja e pagesës së sigurimeve shoqërore është domosdoshmëri. Aeroporti dhe pak do boshatiset nga fluturimet. Me se t’i paguajmë punonjësit nëse nuk do të kemi punë. Do të detyrohemi ti heqim”- thotë Eva Rama nga Explorer Travel & Tours”.
Por deri tani qeveria nuk është shprehur për asnjë masë mbështetëse për biznesin dhe familjet në karantinë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
