Nga Jungah Lee/ Bloomberg Trajektorja e Ekonomisë së Koresë së Veriut po sheh një kthesë surprizë prej rritjes së fortë të 2016-ës, në një tkurrje të mprehtë vitin e kaluar. Parashikimet për të ardhmen janë të zymta.
Vlerësimet e Bankës Qëndrore të Koresë së Jugut tregojnë se Produkti i brendshëm bruto në Veri rezulton 3.5 për qind në 12 muaj deri në dhjetor, rënia më e madhe në dy dekada.
Banka e Koresë e vendosur në Seul, e cila konsiderohet burimi më autoritativ për të dhënat ekonomike për fqinjin e saj, tha se sanksionet e rrepta të vendosura në 2017-ën do të reflektojnë ndikimin e tyre të plotë këtë vit.
Gjendja e dobët e ekonomisë duhet t’i japë presidentit amerikan Donald Trump një shtysë më të madhe në përpjekjet e tij për të bindur udhëheqësin e Koresë së Veriut Kim Jong Un që të braktisë programin e tij të armëve bërthamore, edhe pse regjimi në Phenian ka treguar vullnetin e tij për ta vënë veten mbi mirëqenien e popullit të tij.
Të ardhurat për frymë në Veri u vlerësuan në 1.46 milion ($ 1.285) në vitin 2017, ose rreth 4.4 përqind të asaj të Jugut, u shpreh Banka e Koresë. Banka Qëndrore përdor një shumëllojshmëri informacionesh për të përpiluar shifrat e saj dhe bazohet në departamentet dhe agjencitë e shumta të qeverisë në Jug, si dhe shërbimet e inteligjencës së vendit.
“Intensiteti i sanksioneve ishte relativisht i dobët në vitin 2016, por situate u ashpërsua në vitin 2017, kur ndalimi i eksporteve përfshinte gjithashtu produktet kyçe të Koresë së Veriut si qymyrin, mineral hekuri, ushqime deti dhe tekstile, gjë që rezultoi me një rënie të theksuar të vëllimeve të tregtisë , “Tha Shin Seung-cheol, kreu i ekipit koordinues të llogarive kombëtare të Bankës së Koresë, në një konferencë në Seul.
Sipas Bankës Qëndrore, Eksportet e Koresë së Veriut ranë rreth 37 për qind në vitin 2017 në 1.77 miliardë dollarë. Vëllimi i tregtisë me Kinën, që llogaritej për më shumë se 94 për qind të totalit të vitit të kaluar, ra 13 për qind në 5.26 miliardë dollarë, sipas një deklarate të veçantë nga Korea Trade-Investment Promotion lëshuar më 10 korrik.
Agjencia ia atribuoi rënien e përgjithshme të vëllimit tregtar sanksioneve të vendosura nga Këshilli i Sigurimit të Kombeve të Bashkuara në gusht të vitit të kaluar
OKB gjithashtu ka ngrirë asetet dhe ka ndaluar udhëtimet për individët dhe subjektet e caktuara dhe ka urdhëruar gjithashtu që të gjithë koreanoveriorët që punojnë jashtë duhet të kthehen në shtëpi deri në fund të vitit 2019. SHBA-të kanë vendosur sanksionet e veta, në 2017 ata bënë embargo të plotë tregtare dhe financiare që përfshinë penalitete për bankat jo-amerikane, kompanitë dhe njerëzit që bëjnë biznes me Korenë e Veriut.
Të dhënat e hershme për këtë vit japin një tablo për përkeqësimin e gjërave. Importet e Kinës nga Koreja e Veriut prej janarit deri në maj të këtij viti kanë rënë 87 për qind në krahasim me të njëjtën periudhë të vitit 2017, ka thënë Banka e Koresë, duke cituar të dhënat e lëshuara nga Shoqata e Tregtisë Ndërkombëtare të vendit. Veçanërisht, vëllimi tregtar i Veriut me Jugun ra në 900,000 dollarë në fundvit nga 333 milionë dollarë të regjistruara në vitin 2016. Vëllimi i tregtisë mes dy Koreve është ulur ndjeshëm pas mbylljes së parkut industrial Gaeseong në vitin 2016.
” Nëse sanksionet mbeten të paprekura, sigurisht do të dëmtojnë ekonominë në një afat më të gjatë “, tha Kim Young-hui, një bashkëpunëtor i lartë në Bankën e Zhvillimit të Koresë në Seul.” Koreja e Veriut mund të ruajë gjendjen e tanishme të paprekshme për të paktën një ose dy vjet duke stimuluar konsumin e brendshëm. Por nëse sanksionet vazhdojnë të mbeten në një kohë të papërcaktuar dhe importet e naftës vazhdojnë të bien, kjo do ta dëmtojë rëndë ekonominë në perspektivë.”
*Përktheu: Sabina Veizaj
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
