Mund të duket e çuditshme që një ekip i cili shpenzon mbi 1 milionë euro dhe është kandidat për titullin kampion të ndërrojë 4 trajnerë brenda një sezoni, por te Kukësi tashmë asgjë nuk përbën më çudi. Ekipi verilindor u mposht dje nga Kastrioti me rezultatin 2-1 dhe menjëherë shkarkoi trajnerin Ramadan Ndreun, duke e bërë fajtor atë për humbjen dhe mosangazhim gjatë gjithë ndeshjes. Nuk vonoi shumë dhe menjëherë Kukësi arriti të gjente trajnerin e ri që me shumë mundësi do e udhëheq deri në fundin e kampionatit, nëse nuk do të kemi ndonjë surprizë tjetër.
Ernest Gjoka, trajneri kampion që ka çuar te Kukësi të vetmin titull në vitin 2017-të, është rikthyer te verilindorët. Lajmi është bërë i ditura nga vetë Kukësi përmes një njoftimi të shpërndarë në rrjetet sociale.
Në njoftimin e përgatitur me nxitim nga klubi kuksian theksohet se po rikthejnë në krye të ekipit një trajner kampion. Por ashtu nxitimthi në njoftim Kukësi shkruan edhe për dy kushtet që i janë vënë Ernest Gjokës. “Loja e fortë dhe mos heqja dorë nga titulli Kampion derisa e lejon matematika dhe fitimi Kupës së Shqipërisë”- shkruhet në njoftimin e Kukësit. Janë kushte jo shumë të forta dhe që Ernest Gjoka mund t’i arrijë. Por sërish në këtë pikë mbetet e paqartë nëse tekniku tiranas është marrë për të mbyllur sezonin apo me të do të fillojë të projektohet Kukësi i sezonit të ardhshëm. Pasi nuk do të ishte çudi që Kukësi të fitonte Kupën dhe të dilte nënkampion dhe në fund të shkarkohej nga drejtimi i Kukësit në muajin qershor.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
