.png)
Gazeta Si - Policia e Lezhës ka zbardhur ngjarjen në Rrilë, 54-vjeçari Agron Puka u plagos në shpatull pak pasi kishte lënë fëmijët e tij në shkollë.
Policia thotë se janë identifikuar autorët e dyshuar dhe në kërkim janë shpallur Vinçens Tuku, 32-vjeç, Amarildo Kola, 31-vjeç, të dy banues në fshatin Tale dhe Kevin Ndoka 18-vjeç, banues në Shëngjin.
Po ashtu është arrestuar edhe vetë Agron Puka, pasi ka qëlluar në drejtim të tyre me armë zjarri pistoletë të cilën e mbante pa leje.
Nga hetimet ka rezultuar se të rinjtë, për shkak të një shkak të një konflikti të mëparshëm, për motive të dobëta, kanë tentuar të ndalojnë makinën me të cilën lëvizte Agron Puka dhe më pas kanë qëlluar drejt këtij automjeti me armë zjarri.
Nga ana tjetër, edhe 54-vjeçari po ashtu ka qëlluar ndaj 3 të rinjve me armë zjarri pistoletë, të cilën e mbante pa leje.
Ai aktualisht po merr ndihmë mjekësore në spitalin e Lezhës, ku është jashtë rrezikut për jetën.
Pistoleta e Agron Pukës, u gjet dhe u sekuestruar nga policia bashkë me munuicionin luftarak.
Tre autorët janë shpallur në kërkim për veprat penale “Vrasja me dashje”, mbetur në tentativë dhe “Mbajtja pa leje dhe prodhimi i armëve, armëve shpërthyese dhe i municionit”. Edhe Agron Puka është arrestuar për të njëjtat veprat penale.
Atentati ndaj Agron Pukës, ndodhi mëngjesin e datës 6 mars, para shkollës 9-vjeçare “Marash Gjoni”.
Puka sapo kishte lenë dy fëmijët në shkollë, dhe po largohej për në punë, në një fermë në Balldre.
Ata i zunë pritë dhe hapën zjarr. Shënjestra mori një plumb në shpatull, ndërsa nga pamjet duken 5 vrima plumbash.
Pista kryesore e hetimeve lidhet me një konflikt me sende të forta të pak ditëve më parë, mes Agron Pukës dhe disa personave të tjerë në qytetin e Lezhës.
Ngjarja ndodhi në një moment ku zona ishte e populluar, sidomos me nxënës që frekuentojnë shkollën në fshatin Rrilë, duke shkaktuar panik mes tyre.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
