Ne rrjet

Vrasja që ngriti në këmbë Amerikën

Protestuesit u përleshën sërish me policinë në disa shtete amerikane, për të katërtën ditë radhazi, pas vrasjes së një afro-amerikani të paarmatosur gjatë një arrestimi nga policia në Minneapolis, e cila duket se ka ngritur SHBA në këmbë.

Qindra persona manifestuan jashtë Shtëpisë së Bardhë, duke kërkuar drejtësi për George Floyd. Shumë prej tyre mbanin në duar fotografi të të ndjerit, ndërsa brohorisnin fjalët e tij të fundit: “Nuk marr dot frymë”.

Ky rast ka tërhequr vëmendjen e mbarë vendit si dhe vëmendje ndërkombëtare dhe ka rindezur debatin për trajtimin e personave me ngjyrë në SHBA. Demonstratat tani janë përhapur në qytete të ndryshme amerikane.

Në Mineapolis protestuesit shfrynë revoltimin të enjten duke u vënë zjarrin një stacioni policor dhe disa bizneseve. Demonstruesit thyen dritare biznesesh, në shenjë indinjate për vdekjen e George Floyd. Disa nga banorët e zonës së dëmtuar u shprehën me kritika për reagimin e policisë, por gjithashtu thanë se nuk e kuptonin përse njerëzit po shkatërronin lagjen e tyre, përfshirë dyqanet ku përmbushnin nevojat e përditshme.

Nuk kanë munguar protestat edhe në vende si Kaliforni dhe Nju Jork. Manifestuesit u përballën me ndërhyrjen e ashpër të policisë, teksa në disa zona dogjën godina dhe automjete.

Ngjarja ka ndezur zemërimin kundër policisë amerikane për vrasjet e njerëzve me ngjyrë. Polici Derek Chauvin është xhiruar teksa vendosi gjurin e tij te fyti i 46-vjeçarit me ngjyrë të hënën. Zyrtarët amerikanë njoftuan arrestimin dhe vënien nën akuzë për vrasje të Floyd. Të enjten, pas një proteste, persona të maskuar i vunë zjarrin një stacioni policie si dhe shkatërruan e bastisën ndërtesa të tjera duke detyruar autoritetet të dislokojnë Gardën Kombëtare.

Presidenti Donald Trump, e ka përshkruar ngjarjen si të tmerrshme dhe njoftoi se ka biseduar me familjen e Floyd për t’i shprehur ngushëllimet e tij.

Çfarë ndodhi?

“Të lutem, të lutem, të lutem, nuk mund të marr frymë. Të lutem, o burrë”, u përgjërua Floyd, ndërsa mbahej nga një polic i bardhë. Sipas videove të celularit, oficeri e mbante Floyd-in në tokë me gjurin në qafë. Floyd ishte ndërkohë me pranga.

Oficeri që e vuri në pranga George Floyd-in i thoshte të “qetësohej”, por oficeri nuk i hoqi gjurin nga qafa edhe pasi Floyd pushoi së lëvizuri. Një dëshmitar tha se ai dëgjoi Floyd-in duke thirrur për nënën e tij para se të pushonte lëvizjet dhe duket se humbet ndjenjat.

Xhirimi vazhdon për disa minuta dhe tregon Floyd të shtrirë përtokë, me kokën mënjanë. Ai nuk shihet duke rezistuar. Nga fundi i videos mbërrin ambulanca, ekipi mjekësor ngre trupin e lëshuar të George Floyd, i cili nuk reagon më dhe nuk jep shenja jete, e vendos në barrelë dhe më pas në ambulancë. Autoritetet u thanë gazetarëve më pas se George Floyd vdiq në spital.

“Ai nuk po rezistonte në mënyrë aktive dhe po thoshte se nuk mund të merrte frymë,” tha Charles P. Stephenson, një ish-oficer policie dhe ish-agjent i FBI-së me ekspertizë në taktikat e përdorimit të forcës, i cituar nga Associated Press. “Ata duhet ta mendonin se ekzistonte mundësia (që Floyd nuk mund të merrte frymë), dhe të lironin menjëherë, të eliminonin çdo lloj kufizimi në rrugët e frymëmarrjes”.

Policia e Mineapolisit thotë se Floyd ngjasonte me përshkrimin për një të dyshuar që kishte paguar në një dyqan ushqimesh me një kartmonedhë 20 dollarëshe fallso. Policia thotë se ai rezistoi gjatë arrestimit. Kalimtarët e xhiruan skenën me celular ndërkohë që katër policët e ndaluan George Floyd.

Kryebashkiaku i Mineapolisit, Jacob Frey, tha të premten në mëngjes se qyteti “është i mbushur me dhimbje dhe zemërim”, por shtoi se plaçkitjet dhe vandalizmi në përgjigje të vdekjes së George Floyd-it është “i papranueshëm”

Zoti Frey tha se pronat e dëmtuara, përfshirë stacionin policor janë objekte “me rëndësi jetike për komunitetin”. Ai tha se kishte vendosur të lejonte djegien e stacionit policor, pasi kishte mësuar se protestuesit po përpiqeshin të futeshin brenda. Personeli u evakuua nga ndërtesa para se t’i vihej zjarri së bashku me disa ndërtesa të tjera në zonë. “Tullat e muret nuk janë aq të rëndësishme sa jeta e njerëzve” tha zoti Frey. “Do të vazhdojmë punën”.

Kryebashkiaku Frey gjithashtu iu përgjigj postimeve të Presidentit Trump në Twitter, ku ai thoshte se pas “mungesës së plotë të udhëheqjes” nga Frey, “ose ky politikan i dobët i së majtës të veprojë si duhet, ose do të dërgoj ushtrinë” sepse halabakët “po përdhosnin kujtimin e George Floyd”.

Më Shumë