Vazhdon mallkimi i Tiranës, një pikë ngushëlluese me Skënderbeun

Fatjon Rupi - Fitorja vazhdon të jetë thjesht një dëshirë për Tiranën edhe pas ndërrimit të trajnerit. Ardian Mema nuk e ka shijuar ende suksesin në krye të Tiranës, që përsërit të njëjtat gabime në çdo ndeshje. Edhe me Skënderbeun, mbrojtja e saj ka gabuar fatalisht, duke i "falur" një gol Skënderbeut. Korçarët, pas këtij barazimi në transfertë, i janë afruar një pikë Partizanit dhe mund të përfitojnë më shumë javën e ardhshme, duke ditur se luhet derbi Partizani-Tirana. Ndeshja është luajtur pa tifozë dhe ka dhuruar pak emocione.

Loja ka pasur ritëm në pjesën e parë, me të dyja skuadrat në kërkim të golit, por më shumë ka shtyrë përpara Tirana. Skënderbeu është mbrojtur me kujdes dhe e ka kërkuar golin me goditjet standarde. Pikërisht në një të tilla e ka gjetur, kur krosin e kapitenit Radas e ka devijuar saktë Bruno Dita. Mbrojtja e Tiranës ka qenë në "gjumë", megjithatë skuadra bardheblu ka reaguar dhe ka barazuar në fundin e pjesës së parë me Sentamu, pas një veprimi të bukur teknik të Grecës, që i ka shërbyer saktë.

Pjesa e dytë ka qenë e varfër në raste, duke përjashtuar një rast të Krasniqit, gjuajtja e të cilit është grushtuar nga portieri Abibi. Edhe ndërrimet e trajnerëve Mema e Shehi nuk sollën ndryshim rezultati dhe gjithçka u mbyll 1-1.

Pas ndeshjes, trajneri Orges Shehi pranoi se barazimi ishte rezultati më i drejtë: "Mund ta fitonim ndeshjen, por me atë që u dha në fushë, them se ky rezultat është më i drejti. Për ne nuk është një hap fals, edhe pse nuk arritëm të përfitonim më shumë nga ndalesa e rivalit tonë në Vlorë.

Trajneri Mema nuk i ka kursyer sërish kritikat për të tijtë, duke theksuar se nuk i kupton ato gabime të pafalshme. "Papërgjegjshmëria e lojtarëve po na ndëshkon, sidomos në mbrojtje. Do të doja të kisha lojtarë të tjerë në skuadër", - u shpreh trajneri i Tiranës, që me këtë ecuri do të ketë të vështirë edhe mbijetesën. Bardheblutë kanë shtatë javë që nuk fitojnë një ndeshje në kampionat dhe shkojnë në derbi me moral të ulët.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.