Gazeta Si - Dy ditë pas vendosjes së tritolit në banesën e gjyqtarit të Shkodrës Tonin Sterkaj, policia ofron 30 mijë euro shpërblim për këdo që jep informacion që mund të çojnë në kapjen e autorit.
Ngjarja ndodhi mëngjesin e të dielës, por fatmirësisht nga shpërthimi nuk pati persona të lënduar. Këshilli i Lartë Gjyqësor, të hënën vendosi t’i ofrojë mbrojtje magjistratit dhe familjes së tij për gjashtë muajt e ardhshëm.
LEXO EDHE:
- Policia merr për 6 muaj në mbrojtje gjyqtarin Tonin Sterkaj. Momenti i vendosjes së tritolit në banesë (video)
- Unioni i Gjyqtarëve për kolegun Tonin Sterkaj: Sulm i pabesë e burracak me qëllim frikësimin e magjistratëve
Policia po e heton ngjarjen në pistën e intimidimit të gjyqtarit Sterkaj për shkak të detyrës. Megjithatë nuk përjashtohet as mundësia që vendosja e eksplozivit të jetë bërë për shkak të ndonjë konflikti. Por vetë 62 vjeçari tha jashtë kamerës se nuk ka marrë më herët kërcënime.
Pas ngjarjes Sterkaj u mor në mbrojtje nga policia, ndërsa autori është ende në kërkim.
Ministri i Brendshëm Taulant Balla, sulmin ndaj gjyqtarit e ka cilësuar si akt burracakësh, ndërsa tha se zbardhja e kësaj ngjarjeje është një akt prove për Policinë e Shkodrës.
Ai theksoi se kushdo që guxojë të intimidojë me akte të tilla prokurorë apo gjyqtarë, do të marrë përgjigjen e merituar nga drejtësia.
Ka qenë ora 2 e 55 kur autori afrohet qetësisht pranë banesës së gjyqtarit, duke mos u shqetësuar as nga lehja e qenit. Personi i cili është i maskuar, me kapuç dhe doreza nxjerr lëndën eksplozive nga xhupi. Më pas e ndez në cepin e portës së banesës dhe largohet me shpejtësi nga vendi i ngjarjes.
Autorit i janë dashur rreth 1 minutë për të kryer të gjithë aktin ndërsa nga shpërthimi pati vetëm dëme materiale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.