.png)
Gazeta Si - Pas vendosjes së një sasie tritoli në banesën e gjyqtarit të Shkodrës, Tonin Sterkaj, Këshilli i Lartë Gjyqësor ka vendosur të caktojë mbrojtje për gjykatësin dhe familjen e tij.
Këtë të hënë, të gjithë anëtarët vendosën me vota unanime që për një periudhë 6-mujore, gjyqtari Sterkaj dhe familjarët e tij të vendoset në mbrojtje nga punonjës të policisë së shtetit dhe repartit “RESI”.
Pjesë e mbledhjes ishte edhe ministri i Brendshëm, Taulant Balla, i cili në një komunikim për mediat, tha se shpreson që në vijim të ketë rezultate konkrete, "që të jepet mesazh ndaj çdokujt që mundohet të intimidojë sistemin gjyqësor".
Ndërkohë, kanë dalë pamjet nga momenti i shpërthimit të tritolit në banesën e gjyqtarit të Shkodrës. Siç shihet në videon e siguruar nga Gazeta Si, rreth orës 02:55 të 28 prillit, një person i veshur me rroba të errëta, doreza të bardha dhe kapuç në kokë afrohet tek banesa e gjyqtarit në lagjen "Tom Kola" dhe monton tritolin në cep të derës.
Nga shpërthimi pati vetëm dëme materiale dhe fatmirësisht nuk u lëndua kush edhe pse familja e gjyqtarit Stërkaj ishte e gjitha në banesë. Hetuesit janë duke analizuar pamjet e disa prej kamerave të sigurisë në zonë me qëllim zbulimin e itinerarit dhe identifikimin e autorit.
Në lidhje me motivet është marrë në pyetje edhe gjyqtari 62-vjeçar i cili prej vitesh ushtron detyrën në Gjykatën e Rrethit Gjyqësor Shkodër në seksionin penal.
Mësohet se ai ka deklaruar para hetuesve se nuk ka pasur ndonjë kërcënim dhe se në duar nuk ka çështje sensitive. Gjyqtari ka mohuar të ketë konflikte të tjera ndaj hetimet janë përqendruar tek detyra e tij.
Më herët këtë të hënë, Unioni i Gjyqtarëve dhe Dhoma e Avokatisë Shkodër, kanë dalë në mbrojtje të gjyqtarit Sterkaj, duke u solidarizuar me kolegun e tyre dhe duke dënuar sulmin me tritol në banesën e tij.
Sipas uniformave blu, pista kryesore e hetimeve lidhet me detyrën e Tonin Sterkajt si gjyqtar, megjithatë po hetohen dhe pista të tjera. Sterkaj kryen rolin e gjyqtarit pranë Gjykatës së Shkallës së Parë të Juridiksionit të Përgjithshëm Shkodër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
