Ne rrjet

Terrori nga pandemia dhe rënia ekonomike, italianët drejt një krize mendore

Covid-19 ka vrarë më shumë se 32,000 njerëz në Italinë fqinje dhe ka shkatërruar sistemin e kujdesit shëndetësor, por edhe ekonominë. Dhe ndërkohë që vendi po del dalëngadalë nga bllokimi, kriza e shëndetit mendor po fillon të bëhet gjithnjë e më dukshme.

Në një studim të fundit i Urdhrit të Psikologëve në Itali (CNOP), zbulohet se tetë në 10 italianë kishin nevojë për mbështetje psikologjike për të kapërcyer pandeminë, një përgjigje shumë më e lartë në krahasim me anketat e ngjashme të bëra në të kaluarën.

Psikologët gjithashtu kanë raportuar një rritje të numrit të njerëzve që u drejtohen atyre ndërsa përpiqen të lundrojnë nën “detin e trazuar” të virusit për shkak të ndikimit emocional të distancës fizike dhe shqetësimit ekonomik.

Sara Reginella, një psikologe në Ancona, vuri në dukje një rritje të ankthit dhe depresionit në fillim të bllokimit që ishte i lidhur me izolimin e qëndrimit në shtëpi. Edhe pse disa liri janë rikthyer, ajo tha se shumë njerëz kanë zgjedhur të qëndrojnë brenda, pasi ndjehen më të sigurt atje. Tani që Italia ndodhet në prag të një recesioni të thellë, psikologët paralajmërojnë një kataklizëm në shëndetin mendor ndërsa njerëzit luftojnë me vështirësitë financiare.

Njerëzit po humbasin punën dhe shtëpitë e tyre dhe shqetësohen për sigurimin e së ardhmes së fëmijëve të tyre,” tha Reginella. “Ne nuk po flasim për nevoja shpirtërore, por mbijetesë.”

Që nga fillimi i marsit, 37 njerëz kanë vrarë veten në Itali dhe 25 kanë tentuar vetëvrasje, sipas shifrave të mbledhura nga psikologët.

Federata Kombëtare e Infermierëve konfirmoi se katër infermierë në vijën e parë të pandemisë vranë veten, duke ia atribuar shkakun stresit dërrmues.

Më 6 maj, dy ditë pasi Italia filloi të lehtësojë kufizimet, pronari i një biznesi të vogël në periferi të Napolit u gjet i vdekur në zyrën e tij. Katër pronarë të tjerë të bizneseve të vegjël u përpoqën të vetëvriteshin gjatë javës së parë të muajit.

“Nga hulumtimi ynë, vetëvrasjet janë vetëm më të larta se mesatarja gjatë dy muajve,” tha Armando Piccinni, presidenti i Shoqatës së Psikologëve. “Ne nuk e dimë nëse këta njerëz tashmë ishin në depresion ose po merrnin trajtim. Por ajo që është alarmante është se disa nga rastet ishin të lidhura qartë me pandeminë ”.

Hera e fundit që kishte një rritje të dukshme të vetëvrasjeve në Itali, veçanërisht në mesin e pronarëve të bizneseve të vogla, ishte pas krizës financiare të vitit 2007. Në vitet para kësaj, niveli i vetëvrasjeve ishte në rënie.

Maria Santa Lorenzini, psikologe në Romë, kohët e fundit ka trajtuar shumë nga pronarët e bizneseve që kanë tentuar vetëvrasje.

“Janë krijuar vështirësi të mëdha ekonomike,” tha ajo. “Ata që kanë të ardhura fikse e kanë përballuar më mirë, por të tjerët nuk u ndihmuan sa duhet. Shumë nuk kanë marrë ende ndihmën financiare që iu premtua”, deklaroi ajo.

Piccinni shprehet nga ana tjetër se vetëvrasjet ishin “maja e ajsbergut” të ndikimit më të gjerë psikologjik që kishte sjellë pandemia. “Për çdo përpjekje vetëvrasjeje ose vetëvrasjeje, ka qindra njerëz që jetojnë në një gjendje terrori ose depresioni,” shtoi ai.

Pandemia dhe pasiguria përreth tij kanë përkeqësuar ankthin dhe depresionin tek ata që tashmë vuanin dhe ka shkaktuar për herë të parë probleme të shëndetit mendor tek shumë qytetarë të tjerë.

Duke e ditur këtë, grupi i punës i ngritur nga qeveria italiane për të drejtuar vendin në epokën pas bllokimin, përfshin edhe psikologen e njohur Elisabetta Camussi.

Organizata Botërore e Shëndetit paralajmëroi javën e kaluar që koronavirusi “ka mundësii të mos largohet kurrë” dhe parashikoi një krizë globale të shëndetit mendor.

Psikologët në vendin fqinj kanë luajtur rolin e tyre në gjetjen e një zgjidhjeje, me mijëra prej tyre që po ofrojnë konsulta falas.

“Ne kemi bërë shumë vullnetarisht, por ka një kufi, “tha Reginella. “Qeveria duhet të na paguajë që ne të vazhdojmë të ofrojmë shërbime falas, pasi shumë njerëz nuk kanë para për terapi. Dhe nëse nuk krijohet një projekt i këtij lloji, njerëzit nuk do të përmirësohen”, thotë presidenti i Urdhrit të Psikologëve. Burimi: The Guardian. Solli në shqip: Gazeta “Si”

*Ky material nuk lejohet të kopjohet, apo riprodhohet pa miratimin e Gazetës “Si”. Ai është pronë intelektuale e gazetasi.al dhe si i tillë mbrohet nga ligji.*


Copyright © Gazeta “Si”



Më Shumë