Para

Tërmeti, zgjatet afati i subvencionit për qiratë e familjeve të goditura. Fatura 1,5 mld lekë

Komisioni për Ekonominë dhe Financat ka miratuar aktin normativ për zgjatjen e afatit të subvencionimit të qirasë për familjet e prekura nga tërmeti i 26 nëntorit 2019, të cilat janë të pastreha, deri në momentin e strehimit të këtyre familjeve. Akti i mëparshëm parashikonte subvencionim e qirasë vetëm 1 vit pas dëmtimit të shtëpisë nga tërmeti.

Fatura e shtyrjes së subvecionit është 1,5 miliardë lekë dhe do të paguhet nga buxheti i shtetit 2021.

Sipas Drejtoreshës së Përgjithshme të Buxhetit, në Ministrinë e Financave dhe Ekonomisë, Mimoza Dhëmbi, ky akt synon të përshpejtojë proceduarat e subvencionit të qirasë.

“Ky akt normativ është propozuar nga Ministria e Financave dhe Ekonomisë, si ministri përgjegjëse për strehimin dhe është marrë miratimi nga Ministria e Rindërtimit. Akti synon të përshpejtojë proceduarat e subvencionit të qirasë. Akti i mëparshëm përcaktonte një afat fiks prej 1 viti për kryerjen e procedurave. Ne propozuam ta shtynim këtë afat për trajtim të familjeve që janë të pastrehë deri në momentin e strehimit të tyre”, është shprehur Dhëmbi.

Kryetari i Komisionit të Ekonomisë dhe Financave, Anastas Angjeli bëri me dije se, mbështetja e familjeve të dëmtuara me qira deri në momentin e strehimit ishte i domosdoshëm, pasi izolimi i shkaktuar nga pandemia krijoi vonesa në nisjen e procesit të rindërtimit.

“Rindërtimi tashmë ka filluar në plan të gjerë. Në buxhetin e këtij viti qeveria ka parashikuar fondet e nevojshme për përfundimin e procesit. Asnjë qytetar i dëmtuar nga tërmeti nuk do të mbetet pa u rimbursuar shuma e qirasë që paguajnë deri në momentin e ndërtimit të shtëpive”.- ka thënë Angjeli.

Të dhënat e Drejtorisë së Përgjithshme të Strehimit, tregojnë se në 2020 në total përfituan subvencionimin e qirasë 13,914 familje. Për këtë drejtori, shifra është dinamike dhe pritet që të ndërtohen banesat e këtyre familjeve.

Nga Durrësi, 300 familje janë larguar nga skema, pasi ata janë strehuar tashmë. Në këtë qytet janë trajtuar me qira rreth 4 mijë familje të prekura nga tërmeti.

Të dhënat tregojnë po ashtu se se deri tani ka përfunduar ndërtimi i 1000 shtëpive individuale. “Nga 28 kantieret e ndërtimit, në 10 prej tyre ka nisur puna. Rindërtimi parashikohet të përfundojë brenda afateve të parashikuara nga qeveria që është pranvera e vitit 2022”- është shprehur në komision Blerina Gjylameti që ishte dhe relatorja e aktit normativ.

Sipas të dhënave të Ministrisë të Rindërtimit deri në nëntor 2020, janë paguar rreth 60% e fondit të miratuar për grantet e rikonstruksionit të apartamenteve dhe shtëpive individuale të dëmtuara nga tërmeti. Përfitues të këtyre grandeve ishin 22 mijë familje për 11 bashki të vendit. Totali i fondit të miratuar për t’u shpërndarë është 9,8 mld lekë.

Programi për dhënien e granteve të rikonstruksionit parashikon që punimet për dëmtime të klasifikuara, si: DS1, DS2, DS3, të mund të kryhen vetë nga qytetarët me rimbursim shteti. Në total në 11 bashkitë e vendit, sipas Ministrisë të Rindërtimit kanë aplikuar online 48,708 qytetarë. Nga këto 25,863 janë klasifikuar DS1, DS2, DS3 për rikonstruksionin nëpërmjet granteve, ndërsa 22,845 janë klasifikuar DS4, DS5 dhe do të përfshihen në programet e rindërtimit. Faza e aplikimeve në platformën elektronike zgjati 1 muaj nga 28 janari deri në 28 shkurt të 2020-s.

Në total në vend u shembën 115 pallate të dëmtuara nga tërmeti, ku numri më i lartë rezultoi në Shijak në 30 pallate, 22 në Kurbin, 5 në Durrës, 8 në Kamëz, 10 në Kavajë, 19 në Vorë, 16 në Krujë, 4 në Lezhë dhe 1 në Mirditë. Në total për t’u riparuar ishin 242 pallate.


Copyright © Gazeta “Si”



Lajme të lidhura


Më Shumë