Raporti më i fundit i KLSH-së (Kontrollit të Lartë të Shtetit) për gjashtëmujorin e parë të vitit tregon se moszbatimi i procedurave në dhënien tenderave publikë dhe kontratave, si një shqetësim permanent i ka shkaktuar buxhetit 336 milionë lekë apo gati 2.7 milionë euro dëm.
KLSH thotë në raport se dëmi është konstatuar si në fazën e zhvillimit të procedurave të prokurimit, ashtu edhe në fazën e zbatimit të kontratave dhe dorëzimit të punimeve.
Problematikat e konstatuara nga auditimet lidhen jo vetëm me planifikim jo të drejtë të nevojave, por edhe një proces të realizuar jo në përputhje me kërkesat ligjore në fuqi. Ato i referohen implementimit jo të saktë të kërkesave dhe detyrimeve ligjore nga entet publike që prokurojnë fondet përmes sistemit të prokurimit publik, fakt që sipas KLSH lidhet edhe me kapacitetet njerëzore jo gjithmonë profesionale, që përfshihen në realizimin e këtij procesi.
Sipas raportit, dëmi prej 270.6 milionë lekë është shkaktuar në fazën e realizimit të procedurave të prokurimit, nga 9 subjekte, shkelje të cilat kanë rezultuar në plotësimin e kritereve të kualifikimit, në skualifikimet e ofertuesve, në hapjen e shqyrtimin e ofertave, në ofertat anomalisht të ulta dhe zhvillohen procedura prokurimi me një pjesëmarrës dhe fitues njëkohësisht. Ndërsa vlera tjetër prej 65.3 milionë lekësh është konstatuar në zbatimin e punimeve nga 8 subjekte.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.