Teksa në vendin fqinj Itali, e cila është e gjitha në karantinë, për të sëmurët kronikë Kryqi i Kuq po u shërben në shtëpi si për medikamentet, ashtu edhe ushqimet, në Shqipëri Ministria e Shëndetësisë ka gjetur një zgjidhje tjetër.
Në kuadër të situatës së krijuar nga COVID-19, Ministria e Shëndetësisë dhe Mbrojtjes Sociale ka nxjerrë një urdhër për aksesimin e medikamenteve për të sëmurët kronikë.
Sipas urdhrit, mjeku gjeneron recetën përkatëse në sistemin e recetës elektronike eRx dhe i komunikon pacientit kodin e recetës me të cilën paraqitet në farmaci.
Në rastet e patologjisë akute, patologjive të reja kronike etj, mjeku realizon vizitën në qendrën shëndetësore ose pranë banesës së pacientit. Në rastet e prezencës së pacientëve pranë institucioneve shëndetësore publike duhet të respektohet në mënyrë rigoroze perimetri i sigurisë dhe distanca midis pacientëve dhe ofruesve të shërbimit, jo më pak se 1,5 metra distancë.
“Mjekët e spitalit rajonal/bashkiak kontaktojnë me pacientët kronikë për tërheqjen e barnave pranë farmacisë së spitalit. Për rastet kritike komunikim me specialistët e QSUT nëpërmjet Telemjekësisë. Respektoni rregullat e reja. Kufizoni lëvizjet e panevojshme”, informon Fondi i Sigurimit të Detyrueshëm i Kujdesit Shëndetësor.
Janë 8695 profesionistë shëndetësorë në Kujdesin Parësor janë në gatishmëri për t’iu shërbyer pacientëve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.