.png)
Të kalosh kohë në park nuk është thjesht një mënyrë për t’u argëtuar. Sipas një studimi të ri, vizitat e rregullta në parqe mund të kenë ndikim të rëndësishëm në shëndetin mendor, sjelljen dhe aftësitë sociale të fëmijëve gjatë rritjes.
Studimi, i publikuar në revistën shkencore Epidemiology and Community Health, përfshiu 4,219 fëmijë dhe zbuloi se ata që vizitonin parqet të paktën një herë në javë, nga lindja deri në moshën 11-vjeçare, kishin rezultate mesatarisht 16.5% më të larta në vlerësimet e zhvillimit social-emocional, krahasuar me fëmijët që shkonin më rrallë.
Këto rezultate mbetën të dukshme edhe pasi studiuesit morën parasysh faktorë si gjendja ekonomike dhe problemet familjare.
Sipas studiuesit kryesor, Mark Ferguson, nga Universiteti i Exeter në Mbretërinë e Bashkuar, parqet u ofrojnë fëmijëve mundësinë për të qenë fizikisht aktivë, për të luajtur lirshëm dhe për të zhvilluar imagjinatën, vetëbesimin dhe pavarësinë.
Hulumtimi tregoi se vizitat më të shpeshta në parqe lidhen me përmirësime në menaxhimin e emocioneve, krijimin e marrëdhënieve me bashkëmoshatarët dhe përballimin e sfidave të përditshme.
Përfitimet u vunë re si në uljen e problemeve emocionale dhe vështirësive në marrëdhëniet shoqërore, ashtu edhe në përmirësimin e sjelljes dhe përqendrimit.
Një tjetër përfundim interesant lidhet me pabarazitë ekonomike. Fëmijët nga familjet më të favorizuara kishin tendencë të frekuentonin parqet më shpesh që në moshë të vogël, ndërsa ata nga familjet me më pak mundësi ekonomike i vizitonin më shpesh në vitet e mëvonshme.
Studiuesit theksojnë se parqet mund të ndihmojnë në zvogëlimin e këtyre dallimeve, pasi janë hapësira publike që mund të shfrytëzohen pa pagesë.
Megjithatë, që kjo të jetë e mundur, nevojiten parqe të sigurta, të mirëmbajtura dhe lehtësisht të aksesueshme për të gjitha familjet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje