Sulme gjatë natës në Gaza, mbi 50 të vdekur. Biden në Tel Aviv për të ‘zbutur’ Izraelin

Gazeta Si - Numri i të vdekurve nga sulmet e fundit ajrore izraelite në Gazën jugore është rritur në të paktën 54, sipas burimeve palestineze të cituara nga Al Jazeera.

Të paktën 28 nga njerëzit e vrarë humbën jetën nga kampi Al Shaët në Rafah, raportoi transmetuesi në gjuhën arabe. Mes viktimave kishte shumë gra dhe fëmijë.

Sakaq, gati 500,000 izraelitë janë zhvendosur brenda vendit pas sulmeve të Hamasit më 7 tetor, tha zëdhënësi i Forcave të Mbrojtjes të Izraelit (IDF) në një konferencë për shtyp sot. “Rreth gjysmë milioni izraelitë janë zhvendosur” brenda kufijve të vendit.

“Ne nuk duam që civilët të afrohen pranë zonave të luftimit. Mbi të gjitha, ne duam të mbrojmë qytetarët tanë nga efektet shkatërruese të luftës”, tha ai.

Ndërkohë presidenti amerikan Joe Biden pritet të vizitojë Izraelin të mërkurën dhe më pas do të shkojë edhe në Jordani, ku do të takohet me mbretin Abdallah dhe Abu Mazen.

Nuk ka pasur asnjë konfirmim zyrtar nga Shtëpia e Bardhë apo qeveria izraelite në lidhje me vizitën e Biden.

Sipas gazetës “New York Times”, vizita e presidentit amerikan në Izrael do të vonojë operacionin e planifikuar tokësor të Izraelit në Rripin e Gazës për të paktën 24 orë.

Zëdhënësi i ushtrisë izraelite, Jonathan Conricus, duke iu përgjigjur pyetjeve të gazetarëve mbi kohën e një operacioni tokësor izraelit, tha: “Do të duhet të presim dhe të shohim. Ne nuk kemi dëshirë të vrasim apo plagosim jo luftëtarë”, tha ai.

"New York Times" raportoi gjithashtu se Izraeli ka kërkuar ndihmë urgjente nga Shtetet e Bashkuara në shumën prej 10 miliardë dollarësh.

Të dielën, shtypi izraelit raportoi se kryeministri, Benjamin Netanyahu, i bëri një ftesë presidentit të SHBA për të vizituar Izraelin në një shfaqje solidariteti në mes të luftës së vazhdueshme Izrael-Palestinë.

Biden e vizitoi më parë Izraelin në korrik të 2022. Në një zhvillim të ngjashëm, Sekretari i Shtetit i SHBA, Antony Blinken, vizitoi Izraelin të hënën për të takuar zyrtarët izraelitë.

Pas sulmeve të lëvizjes islamike palestineze që shkaktuan vdekjen e 1400 njerëzve në Izrael, ushtria ka bombarduar Rripin e Gazës dhe po përgatitet për një ofensivë tokësore duke shkaktuar lëvizje të mëdha të popullsisë në enklavën e vogël që i nënshtrohet bllokadës tokësore dhe ajrore dhe detarëve izraelitë për 15 vjet.

Sipas OKB-së, një milion njerëz u larguan nga veriu i Rripit në jug të territorit brenda një jave.

Sipas autoriteteve lokale palestineze, sulmet hakmarrëse të kryera nga Izraeli që nga 9 tetori kanë vrarë të paktën 2750 njerëz, shumica prej tyre civilë palestinezë, duke përfshirë qindra fëmijë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.