Studimi 85-vjeçar i Harvardit/ Punët pa ndërveprim njerëzor janë më të palumturat

Punët më të palumtura janë gjithashtu disa nga më të vetmuarat, sipas një studimi 85-vjeçar nga studiuesit e Harvardit.

“Janë disa karakteristika të punëve të ndryshme që i bëjnë punonjësit të palumtur”, thotë Robert Waldinger, profesor në Harvard.

Punët që kërkojnë pak ndërveprim njerëzor dhe nuk ofrojnë mundësi për të ndërtuar marrëdhënie kuptimplote me kolegët priren të kenë punonjësit më të mjerueshëm, zbuloi studimi.

Që nga viti 1938, studiuesit e Harvardit kanë mbledhur të dhëna shëndetësore nga më shumë se 700 pjesëmarrës nga e gjithë bota dhe u kanë bërë pyetje të hollësishme për jetën e tyre çdo dy vjet.

Sekreti për të jetuar një jetë më të lumtur, më të shëndetshme dhe më të gjatë, përfunduan ata, nuk janë paratë, suksesi profesional, stërvitja apo një dietë e shëndetshme por janë marrëdhëniet pozitive ato që i bëjnë njerëzit të lumtur gjatë gjithë jetës së tyre.

Kjo vlen edhe për punët tona.

“Është një nevojë kritike sociale që duhet të plotësohet në të gjitha aspektet e jetës sonë”, shpjegon Waldinger. “Plus, nëse jeni më i lidhur me njerëzit, ndiheni më të kënaqur me punën tuaj dhe bëni punë më të mirë”.

Vetmia në vendin e punës është më e zakonshme nga sa mendoni

“Punët e vetmuara” janë të zakonshme në industritë emergjente, të drejtuara nga teknologjia, ku njerëzit shpesh nuk kanë fare bashkëpunëtorë, ose shitjet me pakicë në internet, ku puna është "aq e shpejtë dhe e furishme" sa punonjësit në të njëjtën turne mund të mos i dinë as emrat e njëri-tjetrit.

Sidoqoftë, vetmia nuk i prek vetëm ata që janë në punë të vetmuar pasi edhe njerëzit që janë shumë të zënë mund të ndjehen të trishtuar nëse nuk kanë ndërveprime pozitive dhe kuptimplote me të tjerët.

Waldinger tregon punët e shërbimit ndaj klientit si shembullin kryesor të kësaj,

“Ne e dimë se njerëzit në qendrat e thirrjeve shpesh janë jashtëzakonisht të stresuar nga puna e tyre, kryesisht sepse janë në telefon gjatë gjithë ditës me njerëz të padurueshëm”, thotë ai.

Ndjenja e shkëputjes nga të tjerët në punë është gjithashtu një shqetësim shëndetësor. Studimet e fundit kanë treguar se, ndërsa rritemi, vetmia mund të rrisë rrezikun e vdekjes po aq sa duhani, obeziteti dhe pasiviteti fizik.

Socializimi është i mirë për karrierën... dhe shëndetin tuaj mendor

Krijimi i mundësive të vogla për lidhje sociale në punë mund të jetë rigjenerues dhe të ndihmojë në zbutjen e ndjenjave të vetmisë dhe pakënaqësisë, zbuluan studiuesit.

Për shembull, mund të keni një takim pesë-minutësh me një bashkëpunëtor miqësor ose të gjeni njerëz me interesa të ngjashme me të cilët mund të kaloni kohë pas një dite stresuese.

Një raport i vitit 2022 nga Gallup tregon se njerëzit që kanë një mik më të mirë në punë janë më produktivë dhe më të angazhuar në punën e tyre sesa ata që nuk e kanë.

Burimi: CNBC. Përshtati: Gazeta Si.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.