.png)
Gazeta Si - Shtohen masat e sigurisë për kreun e Prokurorisë së Posaçme Altin Dumani. Sipas burimeve paraprake, prej 2-3 javësh, drejtuesi i SPAK, një prej institucioneve më të rëndësishme të drejtësisë lëviz me makinë të blinduar.
Po kështu mësohet se pranë shtëpisë së tij është shtuar një grup policor që siguron çdo lëvizje hyrje dhe dalje.
Zona është monitoruar me dronë dhe kamera, si dhe janë shtuar grupet e gatishmërisë ku ndodhet banesa e Dumanit në Kombinat në Tiranë. Nuk ka informacione zyrtare nëse Dumanit i është rrezikuar jeta e tij apo e familjarëve.
LEXO EDHE:
Altin Dumani merr detyrën si kreu i ri i SPAK: Luftë agresive ndaj korrupsionit të zyrtarëve
Po kohët e fundit, SPAK, i drejtuar nga Altin Dumani ka ndërmarrë disa operacione, ku në pranga kanë rënë personazhe të botës së krimit, por edhe zyrtarë të lartë të politikës.
Informacioni në fakt konfirmohet edhe nga SPAK, i cili në një njoftim për mediat thekson se mbrojtja e Dumanit është konform procedurave standarde të miratuara.
"Në zbatim të akteve ligjore dhe nënligjore Drejtuesi i Prokurorisë së Posacme mbrohet nga Garda e Republikës e cila bashkëpunon dhe koordinon veprimet me Policine e Shtetit. Mbrojtja e Drejtuesit të Prokurorisë është konform procedurave standarte të miratuara", - konfirmon SPAK në njoftimin për mediat.
Që prej ngritjes së SPAK dhe Byrosë Kombëtare të Hetimit, me një vendim të Këshillit të Ministrave, qeveria ka vendosur që gjyqtarëve dhe prokurorëve t'u sigurohet mbrojtja personale.
"Gjyqtarëve të gjykatave kundër korrupsionit dhe krimit të organizuar, prokurorëve të Prokurorisë së Posaçme dhe drejtorit të Byrosë Kombëtare të Hetimit u sigurohet mbrojtja personale", thuhet në vendim të datës 10 korrik 2019.
Për garantimin e sigurisë së oficerëve, janë të ngarkuar në mbrojtjen e tyre, Ministria e Brendshme, ku përfshihet Garda e Republikës dhe Policia e Shtetit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
