Si mund të ndikojë ndryshimi i klimës në gastronominë europiane?

Fermerët në Italinë jugore po kultivojnë avokado dhe mango. Krijesa tropikale si peshku-lepur po shfaqen në rrjetat mesdhetare. Dhe prodhuesit e verës në Bordo shqetësohen se rrushi i tyre Merlot mund të zhduket. Pesëdhjetë vjet më parë e gjithë kjo do të ishte e paimagjinueshme. Por që nga fillimi i viteve 1980, temperaturat në rritje kanë detyruar disa fermerë të zëvëndësojnë rrushin me fruta pasioni.

Italia dhe Franca kanë qenë prej kohësh krenare për kuzhinat e tyre. Të dy vendet ruajnë me konservatorizëm rregullat që thonë se vetëm proshuta e bërë në Parma mund të quhet "Prosciutto di Parma" dhe vetëm vera e gazuar e bërë në shampanjë mund të quhet shampanjë. Roquefort, që është më i famshëm i djathrave blu, mori një mbrojtje e veçantë nga parlamenti i Tuluzës në 1550.

Fakti i të qenit i rritur në një vend të famshëm është parë tradicionalisht si një garanci e cilësisë. Por ndryshimi i klimës mund ta shqetësojë atë. Merrni polentën, një pjatë tipike italiane e përbërë pothuajse tërësisht nga misri i bluar. Temperaturat e larta dhe moti më i thatë e i ngrohtë kanë ulur tashmë rendimentet e misrit në Italinë jugore.

Nëse ky model vazhdon dhe përhapet drejt veriut, a do të duhet që prodhuesit italianë të polentës ta porosisin misrin e tyre gjetkë? Po gruri i fortë, i cili rritet me bollëk në vendet mesdhetare dhe përdoret për të bërë makarona, bukë dhe kuskus?

Pra, a duhet të shqetësohen ata për të ardhmen e spagetit? Gabriele Cola, një studiuese në Universitetin e Milanos, është optimiste për periudhën afatshkurtër. "Unë nuk shoh ndonjë rrezik serioz, sepse bujqësia është më e informuar dhe e aftë teknologjikisht, kështu që gjithmonë mund t'i përgjigjet ndryshimeve," thotë ai. Ujitja në doza të shtuara mund të kundërshtojë efektet e thatësirës. Shkencëtarët gjithashtu mund të kultivojnë varietete më rezistente të kulturave që mbjellin.

Por në planin afatgjatë duket se ka një ndryshim më të thellë. Nëse temperaturat rriten pa u ndalur, fermerët në Europën veriore mund të zbulojnë se mund të kultivojnë prodhime jugore; polenta mund të pushtojë Gjermaninë. Dhe lokavoret jugore mund të duhet të përshtaten. Nëse frutat tropikale vazhdojnë të lulëzojnë në Siçili, a mund të konsiderohet një ditë pica me proshutë dhe ananasi autentikisht italiane?

Burimi: The Economist/ Përshtati: Gazeta “Si”

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.