.png)
Shtetasit e Shqipërisë që jetojnë në Ukrainë, nuk kanë shprehur ende interesim për t’u larguar nga ky vend, me gjithë frikën për një pushtim të mundshëm nga Rusia.
Tensionet midis dy vendeve janë të larta dhe këshilltari për siguri kombëtare i Shtëpisë së Bardhë, Jake Sullivan, ka paralajmëruar se sulmi mund të ndodhë “në çdo moment”.
Për pasojë, disa vende, përfshirë Shqipërinë dhe Kosovën, u kanë bërë thirrje shtetasve të tyre që jetojnë në Ukrainë, të largohen nga ky vend.
Numri i shtetasve shqiptarë në Ukrainë është i vogël, thotë për Radion Evropa e Lirë Albana Qehajaj, këshilltare për media në Ministrinë e Punëve të Jashtme të Shqipërisë.
“Mund të jenë dhjetëra, diku 30 ose 40. Shifra nuk është zyrtare ende”, thotë ajo dhe shton se, deri më tani, nuk ka pasur kërkesa për largimin e tyre nga Ukraina.
Një shtetas shqiptar që prej tri vitesh jeton në këtë vend të Evropës Lindore, është Devis Xama.
Duke folur për Radion Evropa e Lirë nga qyteti Lviv i Ukrainës, 34-vjeçari thotë se, tani për tani, nuk ndihet i rrezikuar.
“Çdo shtëpi ka nxjerrë nga një flamur në ballkon, çdo televizion paraqet ceremoni të ndryshme që mbahen në Kiev për këtë ditë”, thotë Xama, duke iu referuar 16 shkurtit, datë të cilën presidenti i Ukrainës, Volodymyr Zelensky, e ka shpallur Ditë të Unitetit.
“Marketet punojnë, njerëzit shkojnë në punë, shkollat vijojnë normalisht”, tregon Xama, i cili punon për një kompani amerikane.
Qyteti ku jeton ai, ndodhet dhjetëra kilometra larg kufirit me Poloninë. Ai thotë se ka kontaktuar me Ambasadën e Shqipërisë në Poloni dhe se është përgatitur që, në rast të përshkallëzimit të situatës, të largohet përmes Polonisë.
“Normalisht që nëse ata [rusët] do të vijnë, do të largohemi”, thotë Xama.
Në Lviv, së fundmi, është zhvendosur edhe Mariglen Kadiasi, 30 vjeç.
Ai ka jetuar në kryeqytetin e Ukrainës, Kiev, që prej vitit 2019, për t’u larguar drejt qytetit perëndimor pas, siç thotë, rritjes së tensioneve ndërmjet Rusisë dhe Ukrainës.
“Me dëshirën time dhe të bashkëshortes sime nuk do të largoheshim”, thotë ai, por shton se kjo mund të ndryshojë nëse situata përkeqësohet.
Njësoj edhe Alban Cali, një tjetër shtetas shqiptar që jeton në Ukrainë për më shumë se 6 vite, thotë se nuk planifikon të largohet, së paku tani për tani.
“Jam në marrëdhënie pune, kam njerëz nën vartësi dhe situata nuk është aq kritike saqë të largohem tani”, thotë Cali për Radion Evropa e Lirë.
Edhe Ministria e Punëve të Jashtme dhe Diasporës e Kosovës, që më 13 shkurt, u ka bërë thirrje qytetarëve kosovarë që “të largohen sa më parë nga Ukraina”.
Megjithatë, MPJD-ja nuk ka bërë të ditur se sa është numri i qytetarëve kosovarë që jetojnë në Ukrainë dhe tani për tani nuk ka asnjë informacion për lëvizjen e mundshme të tyre.
Nga vendet e Ballkanit Perëndimor, thirrje të ngjashme për shtetasit e tyre kanë lëshuar edhe Mali i Zi, Maqedonia e Veriut dhe Serbia.
Rusia, që në fund të vitit të kaluar, ka grumbulluar ushtarë në kufijtë lindorë dhe veriorë të Ukrainës.
Sipas inteligjencës amerikane, numri i forcave të mbledhura atje ka arritur tashmë në rreth 130,000.
Rusia mohon se ka plane për pushtimin e Ukrainës dhe thotë se NATO është ajo që paraqet kërcënim për sigurinë e saj.
Shteti rus ka kërkuar garanci nga NATO se do të ndalojë zgjerimin drejt lindjes dhe se nuk do të pranojë në radhët e saj vendet ish-sovjetike, përfshirë Ukrainën.
SHBA-ja dhe NATO kanë refuzuar kërkesat ruse për zgjerimin, por kanë ofruar rrugë diplomatike për zgjidhjen e krizës.
*Marrë nga Radio Evropa e Lirë
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
