Kredia për blerjen e banesave ka vijuar tendencën e rritjes gjatë tremujorit të parë të këtij viti sipas të dhënave të BSH.
Në fund të tremujorit, kredia hipotekare përbën mbi 70% të kredisë për individë dhe pesha e saj është rritur me 0.7 pikë përqindjeje në krahasim me të njëjtën periudhë të vitit të kaluar.
Përbërja sipas monedhës e kredisë hipotekare është lehtësisht e dominuar nga kredia në monedhë vendase, me 56% të totalit.
Ecuria e kredisë për shtëpi është mbështetur nga kushtet e ofertës, ku vërehet një lehtësim i standardeve të kredisë për blerje banese, nga tremujori i tretë i vitit 2020 dhe duke vijuar kështu edhe në dy tremujorët pasardhës.
Paralelisht, edhe kërkesa e individëve për kredi me qëllim blerjen e një banese ka hyrë në territor pozitiv.
BSH vërën se është përmirësuar edhe kredia konsumatore e cila përbën rreth 30% të kredisë së dhënë për individë, duke e lidhur këtë zhvillim me përmirësimin e treguesit të besimit konsumator.
Norma mesatare e interesit për kreditë në lekë për individët rezultoi 6.5% në tremujorin e parë të vitit, duke u rritur lehtë nga niveli mesatar prej 6.3% që ishte në dy tremujorët e mëparshëm.
Në këtë horizont kohor, interesi i kredive konsumatore mbeti thuajse i pandryshuar, në 8.4%.
Rënia e interesit të kredisë hipotekore në euro, në 3.3%, nga mesatarja relativisht e qëndrueshme prej 4.0% e vitit 2020 është ajo që bie në sy për tremujorin e këtij viti.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.