.png)
Nga Gazeta ‘Si’- Deputetja shqiptare Ermina Lekaj Prljaskaj nga Bashkimi i Shqiptarëve në Kroaci nuk ka arritur që të sigurojë mandatin e deputetit.
Pesë pakicat kombëtare, shqiptare, boshnjake, malazeze, maqedonase dhe sllovene do të përfaqësohen nga Armin Hodzhiç, kandidat i Koordinimit Kombëtar të Boshnjakëve në Kroaci, i cili ka marrë votat e 3 mijë e 328 votuesve.
Shqiptarja Lekaj Prljaskaj, e cila synonte të punonte në ngritjen e vetëdijësimit të bashkëatdhetarëve duke synuar që komuniteti shqiptar në Kroaci të bëhet faktor i rëndësishëm në shoqëri dhe në aspektin politik, mori vetëm 2mijë e 239 vota.
Partia Konservatore, Bashkimi Demokratik Kroat, fitoi me një diferencë të thellë zgjedhjet parlamentare përballë koalicionit të majtë të drejtuar nga Presidenti Zoran Milanoviç.
Konservatorët fituan 60 vende në parlamentin me 151 vende. Ndërsa koalicioni i majtë me në krye Partinë Social-Demokrate fitoi 42 vende.
Edhe pse me një rezultat pozitiv, partia qeverisëse e Kryeministri Andrej Plankoviç do ketë nevojë për mbështetje nga grupet e ekstremit të djathtë për të qëndruar në pushtet.
“Duke filluar nga nesër në mëngjes, ne do të fillojmë të formojmë një shumicë të re parlamentare për të formuar qeverinë tonë të tretë. Dua të përgëzoj partitë e tjera që u mundën nga HDZ”, tha Andrej Plankoviç, Kryeministër i Kroacisë.
Për kreun e social-demokratëve, pakënaqësia është e qartë por shprehen se do të provojnë qeverinë e re nëse do u qëndrojë premtimeve për të luftuar korrupsionin.
“Nesër do të fillojnë bisedimet me ata që deri dje thoshin se nuk do të mbështesin Bashkimin Demokratik Kroat (HDZ) dhe se nuk do të tolerojnë më një Kroaci të korruptuar dhe të degraduar. Dhe tani është obligim i secilit prej nesh për t'i demonstruar popullit kroat nëse fjalët e folura gjatë fushatës ishin thjesht trillime dhe mashtrime apo nëse ishte e vërteta që qëndron pas dëshirës së vërtetë për ndryshim.", u shpreh Pedja Grbin, Kryetar i Partisë social-demokrate.
Në garën për parlamentin e Kroacisë nuk ishin vetëm politikat e brendshme të ardhshme të vendit, por edhe uniteti i BE-së, ndërsa ajo përballet me paqëndrueshmërinë nga pushtimi i plotë i Ukrainës nga Rusia.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
