.png)
Gazeta Si – Një shpërthim masiv në një fabrikë fishekzjarrësh në Kinën qendrore, ka vrarë të paktën 26 persona dhe ka plagosur 61 të tjerë, raportuan sot mediat shtetërore.
Shpërthimi ndodhi rreth orës 16:43 pasdite (ora lokale) të hënën në Kompaninë e Prodhimit dhe Shfaqjes së Fishekzjarrëve Huasheng në Liuyang, Provinca Hunan, raportoi transmetuesi CCTV.
Videot e postuara në mediat sociale tregojnë shpërthime pasuese dhe një re të madhe tymi që ngrihet në ajër.
Pamjet e dronit të publikuara të martën nga CCTV tregojnë mbeturina që digjen aty ku dikur ndodheshin ndërtesat, ndërsa ekipet e shpëtimit gërmojnë nëpër rrënoja.
Disa ndërtesa që janë ende në këmbë vazhdojnë të nxjerrin tym dhe disa kanë humbur çatitë e tyre. Kryetari i bashkisë së Changshas, Chen Bozhang, tha se operacionet e kërkim-shpëtimit në vendin e shpërthimit janë kryesisht të përfunduara, por verifikimi i numrit të viktimave dhe identifikimi i trupave janë ende në vazhdim. Autoritetet po hetojnë shkakun e shpërthimit dhe policia ka ndaluar menaxherin e kompanisë, raportoi agjencia “Xinhua”.
Më shumë se 480 persona u dërguan në vendngjarje për të kryer operacione kërkim-shpëtimi. Njerëzit në afërsi u evakuuan.
Menaxhmenti i kompanisë u ndalua nga policia, ndërsa hetimi vazhdon, raportuan mediat shtetërore. Presidenti kinez, Xi Jinping bëri thirrje për “gjithçka të mundshme” për të trajtuar të plagosurit, për të kërkuar të zhdukurit dhe për të mbajtur përgjegjës ata që janë përgjegjës, raportoi agjencia zyrtare e lajmeve “Xinhua”.
I vendosur në një zonë rurale, Liuyang prodhon afërsisht 60% të fishekzjarrëve të shitur në Kinë dhe 70% të eksporteve.
Aksidentet industriale, përfshirë në sektorin e piroteknikës, janë të shpeshta në Kinë për shkak të rregulloreve të dobëta të sigurisë.
Vitin e kaluar, një shpërthim në një fabrikë fishekzjarrësh në Hunan vrau nëntë persona. Në shkurt, disa shpërthime në dyqanet e fishekzjarrëve vranë gjithsej 20 persona.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje