.png)
Nga Gazeta ‘Si’- Edhe pse NATO njoftoi në muajin mars se të gjitha vendet anëtare kishin arritur objektivin për të shpenzuar të paktën 2% të Prodhimit të Brendshëm Bruto për mbrojtjen gjatë vitit të kaluar, një raport i medias holandeze “De Telegraaf” ngre dyshime mbi saktësinë e këtyre të dhënave.
Sipas artikullit, një verifikim i brendshëm i NATO-s ka zbuluar se tre vende anëtare nuk e kanë përmbushur në të vërtetë pragun e kërkuar prej 2%, pavarësisht se fillimisht raportuan se e kishin arritur atë.
Në veçanti, Shqipëria dhe Sllovenia përmenden si vende që kanë mbetur rreth gjysmë pikë përqindjeje nën objektiv, ndërsa një tjetër vend gjithashtu rezulton nën kufirin e 2% (Çekia).
Burime të informuara thonë se këto shtete rrezikojnë të mos e arrijnë sërish objektivin edhe këtë vit, ndërsa shqetësime ekzistojnë edhe për Hungarinë.
Debati për shpenzimet e mbrojtjes është intensifikuar në prag të presionit të vazhdueshëm nga ish-presidenti amerikan Donald Trump, i cili ka kërkuar prej kohësh rritjen e kontributeve të aleatëve europianë në kuadër të NATO.
Ndërkohë, ministri amerikan i Mbrojtjes, Pete Hegseth, ka paralajmëruar masa ndëshkuese ndaj aleatëve që nuk përmbushin detyrimet financiare, përfshirë edhe rishikimin e kontributeve amerikane në buxhetin e Aleancës.
Sipas raportimeve, Shtetet e Bashkuara aktualisht mbulojnë rreth 15% të buxhetit të NATO-s, duke financuar struktura të rëndësishme si selia qendrore, misionet dhe stërvitjet ushtarake.
Në këtë kontekst, Shqipëria madje mund të përballet me rrezikun që të mos i besohet më organizimi i një samiti të ardhshëm të NATO-s, nëse nuk përmirëson përmbushjen e objektivit të shpenzimeve për mbrojtjen, thonë burime të afërta me Aleancën.
Debati pritet të vazhdojë edhe në muajt e ardhshëm, ndërsa NATO përballet me presion të shtuar për rritjen e kapaciteteve të mbrojtjes kolektive dhe harmonizimin real të kontributeve financiare mes anëtarëve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje