SHBA presion Turqisë: F-35 për S-400 ruse

Turqia refuzon thirrjet e Shteteve të Bashkuara të Amerikës për të gjetur një rrugë për të mos përfshirë sistemin anti-ajror rus, S-400 tek arsenali i armëve të ushtrisë së saj. Ankaraja i qëndron deklaratës së Presidentit Recep Taip Erdogan disa javë më parë, kur nënkuptoi se “sistemi është blerë për t’u përdorur, jo për muze”.

Erdogan e vlerëson si të padrejtë dhe të pandershme kërkesën e SHBA, të Bashkimit Europian dhe të vendeve të tjera anëtare të NATO-s. Ai u shpreh i gatshëm që të blejë sistemin amerikan “Patriot”, nëse plotësohet kushti i leverdisshmërisë financiare, ndërsa kërkesën për të larguar sistemin rus e cilësoi “ndërhyrje në punët e brendshme të Turqisë”.

Përballë këtij qëndrimi këmbëngulës të Turqisë është vendosur këmbëngulja e Uashingtonit, që thotë se përsa kohë Ankaraja nuk heq dorë nga S-400 ajo do të qëndrojë jashtë programit të SHBA për avionët F-35, të pakapshëm nga radarët.

“Ka ende hapësira që Turqia të rikthehet në këtë program. Ata e dinë fare mirë se çfarë duhet të bëjnë, ose ta shkatërrojnë, ose ta rikthejnë andej nga e morën, ose të gjejnë një mënyrë tjetër për të hequr qafe sistemin S-400”, deklaroi një zëdhënës i Shtëpisë së Bardhë për gazetarët, duke konfirmuar zërat se Turqia mund të përballet me sanksione në rast të kundërt.

Turqia nënshkroi në 2017 një marrëveshje me Rusinë për t’u furnizuar me sistemin e mbrojtjes ajrore S-400. Marrëveshja çoi në pezullimin e porosisë nga ana e SHBA për avionët F-35 që Ankaraja kishte prenotuar si anëtare e NATO-s.

Uashingtoni refuzon të furnizojë Turqinë me këta avionë duke cituar detaje teknike. Njëri ndër ta, thotë SHBA, është mungesa e përputhshmërisë së sistemit S-400 me armatimin e NATO-s.