.png)
Në një kohë kur Teherani nuk konfirmon negociatat me Uashingtonin, presidenti amerikan, Donald Trump, urdhëron marinën amerikane të qëllojë mbi anijet iraniane në Ngushticën e Hormuzit.
“Kam urdhëruar Marinën e Shteteve të Bashkuara të qëllojë dhe fundosë çdo anije, sado e vogël, që po vendos mina në ujërat e Ngushticës së Hormuzit. Nuk ka asnjë hezitim. Ne po e pastrojmë Ngushticën tani dhe urdhëroj që kjo të vazhdojë në nivel të trefishuar”.
Kreu i Shtëpisë së Bardhë shtoi se Shtetet e Bashkuara kanë kontroll të plotë mbi Ngushticën e Hormuzit, ndërsa vijoi sulmet ndaj Iranit, teksa tha se “ata nuk e dinë kush është udhëheqësi i tyre”, duke ngritur dyshime për përplasje të forta brenda vendit.
Sipas presidentit Trump, Teherani mezi po pret të bëjë një marrëveshje, duke shtuar se gjërat po funksionojnë mirë. Ndërkohë, Komanda Qendrore e SHBA-së tha se, që nga fillimi i bllokadës detare ndaj Iranit, kanë urdhëruar 33 anije të ndryshojnë kurs ose të rikthehen mbrapsht.
Paralajmërimeve të presidentit Donald Trump ju shtua edhe kërcënimi nga Izraeli, i cili tha se është i përgatitur për ta kthyer Iranin “në epokën e errët dhe të gurtë”. Ministri izraelit i Mbrojtjes, Israel Katz, tha se ushtria izraelite po “pret dritën jeshile nga SHBA për të përfunduar eliminimin e dinastisë Khamenei”.
“Sulmi këtë herë do të jetë i ndryshëm dhe vdekjeprurës, me goditje shkatërruese në vendet më të dhimbshme – që do të trondisin dhe shembin themelet e Irani”, u shpreh ministri Katz.
Lëvizjet nga SHBA dhe Izraeli vijnë pasi Irani njoftoi se Republika Islamike ka marrë të ardhurat e para nga tarifat e vendosura anijeve që përdorin Ngushticën e Hormuzit dhe i ka depozituar në Bankën Qendrore të vendit.
Teherani kërcënoi gjithashtu se nëse do të tentohet një hapje me forcë e rrugës detare, “atëherë do të hapen portat e ferrit”, ndërsa njoftoi se parlamenti iranian dhe Këshilli Suprem i Sigurisë Kombëtare po shqyrtojnë së bashku një plan për atë që e quajnë “kontroll sovran” mbi Gjirin e Hormuzit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje