.png)
Nga Gazeta Si- Shqipëria ka kaluar disa faza të dallueshme në përhapjen e infeksionit HIV gjatë tre dekadave të fundit, duke reflektuar ndryshime. Të dhënat për periudhën 1993-2025 tregojnë një tablo që lëviz nga nën-raportimi fillestar drejt një rritjeje graduale dhe, së fundmi, një tendencë të re në rritje.
Sipas të dhënave më të fundit nga Instituti i Shëndetit Publik (ISHP), viti 2025 ka shënuar 125 raste të reja deri në muajin tetor, duke sinjalizuar një rikthim në nivelet më të larta të regjistruara që nga viti 2016. Që nga viti 1993, numri total i personave të prekur në vend ka arritur në një total prej 1,973.
Pas një stabilizimi në vitet 2017–2021 (94–104 raste në vit), nga 2022 vihet re një tendencë e re në rritje.
Incidenca për vitin 2025 është 5.3 raste për 100,000 banorë, ndërsa prevalenca mbetet e ulët (0.083%).
Një nga karakteristikat më të theksuara në Shqipëri është shpërndarja sipas gjinisë dhe moshës. Në të gjitha grupmoshat, meshkujt paraqesin incidencë dukshëm më të lartë se femrat. Diferenca është veçanërisht e theksuar në moshat 20-39 vjeç, duke treguar se meshkujt e rinj dhe në moshë të mesme të hershme janë më të ekspozuar ndaj rrezikut të infeksionit.
Grupmosha 25-29 vjeç tek meshkujt rezulton më e prekura, me 24 raste për 100,000 banorë. Ndërkohë, tek femrat, incidenca më e lartë regjistrohet në grup-moshën 40-49 vjeç, me rreth 5 raste për 100,000 banorë. Edhe grupi 30-39 vjeç vijon të ketë nivele të larta, veçanërisht tek meshkujt. Pas moshës 40 vjeç, incidenca bie gradualisht, por rastet nuk mungojnë as në moshat mbi 50 vjeç, duke dëshmuar për një përhapje të gjerë në popullatë.
Sa i përket mënyrës së transmetimit, të dhënat tregojnë se rruga seksuale mbetet dominante në Shqipëri.
Transmetimi heteroseksual përbën 72.6% të rasteve, duke zënë pjesën më të madhe të infeksioneve të raportuara. Nga ana tjetër, meshkujt që kryejnë seks me meshkujt (MSM) përfaqësojnë 23.4% të rasteve, një përqindje e konsiderueshme që i vendos ata në një grup me rrezik të lartë dhe kërkon politika të targetuara për parandalim dhe testim të hershëm.
Në një kohë kur trendet globale synojnë uljen e infeksioneve të reja, Shqipëria përballet me nevojën urgjente për të rishikuar strategjitë e saj dhe për të investuar më shumë në parandalim, në mënyrë që të frenojë këtë valë të re të përhapjes së HIV.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje