.png)
Inventarët globalë të naftës po bien me ritme rekord, ndërsa ndërprerjet e vazhdueshme të shkaktuara nga lufta me Iranin kërcënojnë rritje të mëtejshme të çmimeve, paralajmëroi të mërkurën Agjencia Ndërkombëtare e Energjisë (IEA).
Rezervat e naftës bruto dhe të karburanteve të rafinuara ranë me një ritëm prej pothuajse 4 milionë fuçi në ditë gjatë prillit ekuivalente me konsumimin e kombinuar të Britanisë së Madhe dhe Gjermanisë duke rrezikuar të zvogëlojnë rezervat mbrojtëse mbi të cilat vendet mbështeten për të përballuar goditjet në furnizim.
“Bota po konsumon inventarët e naftës me ritmin më të shpejtë në histori, ndërsa vendet importuese përballen me ndërprerje të paprecedenta të furnizimeve nga Lindja e Mesme,” tha IEA në raportin e saj mujor shumë të ndjekur.
“Tkurrja e shpejtë e rezervave, mes ndërprerjeve të vazhdueshme, mund të paralajmërojë rritje të tjera të forta të çmimeve në të ardhmen.”
Paralajmërimi i IEA-së do të shtojë shqetësimet se rezervat e disa llojeve të karburanteve mund të arrijnë nivele kritikisht të ulëta këtë verë, duke detyruar konsumatorët të konkurrojnë për furnizime gjithnjë e më të pakta.
IEA tha se rezervat globale të naftës kanë rënë me pothuajse 250 milionë fuçi që nga fillimi i luftës, “me humbje edhe më të mëdha” nëse përjashtohet nafta e bllokuar në Gjirin Persik për shkak të mbylljes pothuajse të plotë të Ngushticës së Hormuzit.
Agjencia tha se humbjet në furnizim nga Gjiri po kompensohen deri diku nga ulja e konsumit, përfshirë në vendet e zhvilluara.
Europa pritet të ulë konsumin e naftës këtë vit në një shkallë që nuk është parë që pas pushtimit të Ukrainës nga Rusia, me një rënie prej 140 mijë fuçi në ditë këtë vit, sipas IEA-së.
Kjo parashikon që lufta me Iranin të përfundojë deri në fillim të qershorit, tha IEA. Nëse konflikti vazhdon përtej kësaj periudhe, Evropa do të detyrohej të bëjë shkurtime të tjera.
Të gjitha vendet importuese të naftës janë prekur nga mbyllja pothuajse totale e Ngushticës së Hormuzit përmes së cilës zakonisht kalon rreth një e pesta e naftës botërore për më shumë se 10 javë, si pasojë e kërcënimeve iraniane ndaj anijeve tregtare.
Rënia e flukseve nga Lindja e Mesme ka shkaktuar goditjen më të madhe të furnizimit me naftë në histori. Konsumi ka rënë në shumë vende, veçanërisht në Azi, e cila merr pjesën më të madhe të naftës nga Lindja e Mesme.
Një nga produktet e naftës më nën presion në Europë është karburanti për avionë. Lindja e Mesme furnizoi rreth 60% të karburantit të avionëve të Europës në vitin 2025.
Importet neto ranë me afro 100 mijë fuçi në ditë në prill krahasuar me vitin e kaluar, duke çuar rezervat në qendrën kyçe Amsterdam–Rotterdam–Antwerp nën nivelet më të ulëta të pesë viteve të fundit, tha IEA.
Ndikimi i furnizimeve më të ulëta është zbutur deri diku nga eksportet më të larta nga Amerika e Veriut, veçanërisht SHBA-ja, e cila rriti eksportet e naftës me 430 mijë fuçi në ditë krahasuar me vitin e kaluar dhe drejtoi 80% të këtyre dërgesave drejt Europës, sipas IEA-së./FinancialTimes
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje