.png)
Nga Gazeta Si- Presidenca e Shqipërisë ka reaguar pas lajmit të mediave greke të cilat raportonin se Shqipëria nuk do të përfaqësohej në darkën informale të organizuar nga Kyriakos Mitsotakis, edhe pse kishte marrë ftesë.
Sipas njoftimit të Presidencës, shkak për mungesën e Shqipërisë në darkën e liderëve të Ballkanit Perëndimor, është bërë agjenda e Presidentit Bajram Begaj.
“Më 14 gusht 2023, Kryeministri i Greqisë, Kyriakos Mitsotakis, i ka derguar një ftesë Presidentit të Republikës, Sh.T.Z. Bajram Begaj, për të marrë pjesë në një darkë informale, më 21 gusht 2023, në Athinë. Një ditë më pas, më 15 gusht 2023, Presidenti Begaj në përgjigjen e dërguar, pasi vlerësoi vëmendjen që Kryeministri grek Mitsotakis i kushton zhvillimeve të lidhura me sigurinë e Europës, shprehu gjithashtu keqardhjen për pamundësinë e pjesëmarrjes për shkak të një agjende të përcaktuar më herët”, thuhet në deklaratën e Presidencës.
Ajo që ra në sy ishte fakti që Mitsotakis kishte ftuar në darkë presidentin dhe jo kryeministrin Edi Rama ndërkohë që Kosova dhe Maqedonia e Veriut do të përfaqësohen nga Kryeministrat përkatës. Darka dhe refuzimi i ftesës nga ana e Shqipërisë vjen pas tensioneve në rritje për rastin e Fredi Belerit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
