.png)
Kryeministri i Greqisë, Kyriakos Mtsotakis do të mbajë një darkë informale me një panel të gjerë liderësh të Ballkanit Perëndimor, (por jo vetëm) me qëllim integrimin e këtyre vendeve në BE.
Media greke Protothema i ka kushtuar vend kryesor ftesës së kryeministrit grek ndërsa ajo që bie në sy është mungesa e një ftese për kryeministrin Edi Rama, sa kohë që në nivel kryeministri (në darkën e të hënës) do të përfaqësohet Maqedonia e Veriut madje edhe Kosova me Albin Kurtin.
Në shkrim thuhet se ftesa i është drejtuar Presidentit të Republikës i cili nuk do të jetë.
Mungesa e një ftese ndaj kryeministrit Edi Rama lidhet me debatin e fundit për Fredi Belerin për të cilin Athina ka kërkuar lirimin e tij madje edhe betimin si kryebashkiak, ndërsa Rama i ka kthyer përgjigje të prerë se kjo është çështje drejtësie dhe jo politike.
Protothema nuk e përmend fare Ramën ndër radhë dhe as arsyet e mungesës së Presidentit Begaj por ka pasqyruar pa ngjyrime politike se kush do të marrë pjesë në darkën informale që do të shtrojë kryeministri i Greqisë.
Më konkretisht, liderët e Ballkanit Perëndimor dhe të vendeve anëtare të BE-së do të priten mbrëmjen e së hënës së 21 gushtit, në orën 20.15, nga Kyriakos Mitsotakis në Megaro Maximos në një darkë informale për zgjerimin dhe të ardhmen evropiane të rajonit, me rastin e 20 vjetorit të Samitit BE-Ballkani Perëndimor.
Protothema shkruan se ftesës së kryeministrit të Greqisë i janë përgjigjur presidentja e Komisionit Evropian, Ursula von der Leyen dhe presidenti i Këshillit Evropian, Charles Michel.
Në artikull thuhet se ka konfirmuar pjesëmarrjen Presidenti i Serbisë, Aleksandar Vuçiç, ai i Malit të Zi, Jakov Milatovic, kryeministri i Maqedonisë së Veriut, Dimitar Kovacevski, ai i Kosovës, Albin Kurti. Janë ftuar gjithashtu kryetarja e Këshillit të Ministrave të Bosnje-Hercegovinës Borgiana Christo, presidentja e Moldavisë, Maya Sandu.
Ndërkohë, Protothema nënvizon se Shqipëria është e ftuar në nivel presidenti, porse ky i fundit nuk do të jetë ndërsa lideri i Sllovenisë nuk ka mundur të përgjigjet pozitivisht.
Në diskutim do të marrin pjesë edhe liderët e vendeve të rajonit që janë anëtare të BE-së më konkretisht kryeministri i Bullgarisë Nikolai Denkov, i Kroacisë Andrej Plenkoviç dhe i Rumanisë Ion-Marcel Ciolakou.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
